見証分享‎ > ‎浸禮見証‎ > ‎

林智略 - 求神幫助

posted Mar 2, 2012, 11:15 AM by 筲箕灣潮語浸信會筲箕灣潮語浸信會

好細個嘅時候,因為媽媽係基督徒嘅關係,我都有返教會。直至去到初中,去聽咗一個佈道會,聽完之後,又好似真係好感動,跟住就決志信耶穌,但之後因為掛住玩而冇再理會呢件事,亦都只係覺得我已經係相信咗神就Ok,唔使做啲咩儀式上嘅嘢去証明自己係信咗。

一直到結婚後,當時已經冇乜返教會,就只係會喺有問題有困難時先記得祈禱求神幫助,每次求完後又好似感覺舒服啲。跟住又過咗一段時間,我地想有小朋友,好自然咁又求神幫助喇。好快我地就有咗喜訊,到咗BB出世,佢因為出世時有啲事所以要「訓箱」,我就又再次祈禱求神比佢快啲好番同我地返屋企。之後因為BB嘅緣故所以我返多咗教會,一直到阿仔一歲,因為一個意外而耳仔發炎,原本醫生話要開刀放燶,但我地商量過都係唔開刀,但又唔知點好,之後媽媽話試下比佢老闆醫,因為佢係一個用自然療法嘅治療師,唔使開刀,最後都總算醫好。

跟著過咗幾年,阿仔忽然肚痛,仲持續咗幾日,我地就同佢入咗急症室,點知醫生話要入院觀察,我地全家都好緊張,因為醫生都未清楚係咩事,跟住嗰幾日做咗好幾個test,但依然唔知咩原因會持續咁肚痛,當然喺呢段期間我同Coffee都不斷祈禱求神醫治佢,點知個主診醫生話都係唔知咩事,就同我地講話揾過另一個醫生睇下,好神奇咁呢個醫生揾到原因,我同Coffee都相信,呢個係神嘅安排,最後阿仔都好番哂。跟住又過咗一段時間,Coffee又有咗BB但其實我都幾驚,因為之前醫生就講過因為Coffee嘅身體係唔太適合有多一個BB,但既然呢個係天父嘅安排,我地都只有將一切交比佢,最後細佬出世加上 Coffee係平安我真係好感謝神,亦覺得要做啲嘢去回應天父嘅心意。咁我同Coffee就商量浸禮呢件事,雖然之前錯過咗幾次,但今次終於可以完成到。

Comments