1622 рік. 4 квітня. Донесення возного про утискання селян с. Козлиничів шляхтичем Ф. Підгороденським

Року тысеча шестсот двадцат второго, месеца апреля чотырнадцатого дня.

На вряде кгродском, в замку его королевское милости Луцком, передо мною, Яном Козаковичем, буркграбим и наместником подстароства Луцкого, постановившисе очевисто шляхетный Кирил Островский, возъный енерал воєводства Волынского, который, за показаньем перед урядом нынешним автентику кресованя на вряд свой, в моц правдивое своее реляцыи, ку записаню до книг нинешних явно и доброволне сознал, иж он, за росказанем яснеосвецонего кнежати его милости Ерого з Острога Жаславского, был обецне в селе Козлиничах, в повете Луцком лежачое, маетности дедичное того ж кнежати его милости, там же будучи, маючи при собе, для лепшого сведецтва, людей добрых, шляхетных пана Яна Крыницкого и пана Бартоша Лукговского, видел и урядовне дня тринадцатого месеца квитня, римского календаря в року тепрешнем, тисеча шестсот двадцать втором, великое спустошене того села Козлинич и порозгонянье подданых в том селе добре оселых, на волоках седячих, през урожоного его милость не давных часов змерлого пана Фридриха Подгороденъского, подсудка хелмъского, которые, для великих и не зносных податков, робот незвыклых, и инших анкгарий, темеженя оных над право извычай, за причиною даня его милости пана Подгороденского, проч зжонами и детми и з быдлом поутекали и тое село Козлиничи в нивеч спустошил. А меновите: Данило, сын Харитона, на третийни во локи седячого, з жоною и детми и з бытом всем утек; другой Сац Салязкович, на пулволоци седячий, И З СЫНОМ СВОИМ ТЯГЛЫМ и оселым, подданым речоным, и Мохом, который з жоною и з детми и зо всим добытком утекл; четвертий Матвей Мроз, на пулволоце, з жоною и детми и з добытком; пятый Кузма Кохлаевич, на четвертине, з жо ною и з детми и з добытком; шостый Яцко Конючич, на пулволоци, з жоною и з детми и з добытком; семый Тишъко Ющеня, на волоце седячий, з жоною и з детми и з добытком всим; осмый Назаров сын молодый; девятый Хведко Кудричина з жоною и з детми; десятый Йван Сенкович, з жоною и з детми; одинадцатый Яцко Мелехович, з жоною и з детьми; дванадцатый Панас Юркович, з жоною и з добытком; тринадцатый Мартин Хорбичина з жоною и з детми; чотырнадцатий Мисков сын Курянмолодец; петнадцатый Грицов сын Карп; осмнадцатый Савка Степанович, на пулволоки, з жоною, з детми из добытком всим; деветнадцатый Микита Ивашков сын Брухалович, з жоною, з детми, на пулволоки седячий, и з добытком всим; двадцатый Стас Приступа, на полволоки, з жоною и з детми и з добытком всим; двадцат первый Ших, осочник; двадцат вторый Семен, сын осочника, з жоною и з детми и с конем одним; двадцат третий Павлюк Хорбацович, на полволоки, з жоною и з детми и з добытком всим; двадцат четвертий Хведко Ноинка, на полволоки, з жоною и з детми из бытом; двадцать пятый Юхим Канючич, на пулволоки, з жоною и з детми и з добытком; двадцать шостий Васко Розлада, з жоною и з добытком; двадцать семый Ярошов сын Йван от жоны проч пошол;двадцать осмый Панасов сын Кожулив Явдей молодец; двадцать девятый Остапов сын Васко з жоною; тридцатый Стасюв Винников Хведко, з жоною, з детми; тридцать первый Левко Мрозина Иваничич, з жоною, на полволоки седячий; тридцат вторый Ярош Карпов сын
молодец. И иншие шкоды над повинность чинил, а меновите: у войта яловицу над слушност безправне кгвалътом взял за золотых десет полских; у Карпа Поповича вола за коп чотыре литовских; у Семена Мелеховича вола за коп чотыри литовских; у Грицка Кожулича вола за коп чотыри литовских взял; у Назара вола — коп три литовских; у Данила Миха вола за золотых десет полских; у Харуты вола за коп три литовских; у Миска Головчич яловицу за золотых шест полских; у Андрея Мелеховича яловицу за золоты* шест полских, у Йвана Лечевича вола за коп три литовских — кгвалтовьне взял и на свой по житок обернул; у Уляша вола за коп три литовских; у Паръхома яло вицу за золотых шест полских; — орати их примушал; над повинносте оных гнал до села своего килка миль до Веръбое, под Володимер; од кождого подданного, над звычай и повинност, по куру з дыму виби рати росказал, — а кгды сам его милость пан Подгороденский чинши приехал выбирати, завъше перемешкивал две недели, з слугами своими и з жоною, з шкодою великою убогих подданых: першого часу десет коп литовских напил, а другого часу сем коп литовских, яловицу взял и до дому повезл и иншие стравные речи, што не мог с челядю стравити, до дому своего села Вербое казал отпровадити; слуги его
милости гусей осмеро, по селу ходячи, своволне и кгвалтовне били и брали. О которые вси шкоды, укрывженя и уруганя, такъже анкгарие вшелякие, урожоный пан Матей Барчевъский, слуга яснеосвецоного кнежати его милости Ерого з Острога Жаславского, именем тогож кнежати его милости, пана своего, мною, преречоным возным Кириком Островским, и шляхтою вышей помененою, противко урожоным его милости пану Фридрихови Подгороденскому, подсудкови холмскому, недавного часу змерлого, такьже сукъцесором позоста лим его милости: ее милости панее Алексанъдре Подгороденской и Владиславови, Станиславови и иншим сыном, которые в позвах по именю и прозвиску будут выражоны, соленитер се протестовал, оферуючи кнежати его милости о то все правне чинити часу своего ин форо фори. Што так а не иначей быти сознаваю, просечи, абы тая реляция моя до книг нинешних была записана и принята, — што єсть записано и принято.