مدرسة رويال أكاديمي للغات

مدرسة رويال أكاديمي للغات

Royal Academy Language School

 

العنوان: اول طريق سقارة السياحى – الهرم

التليفون: 101112911 – 33814701- 33814376- 33811782

المصاريف:

        6300

        الباص: 1600: 2000

        الزي: 500


أراء أولياء الأمور فى المدرسه :

 

 

Merehan    04-2008

عن تجربة مدرسة رويال اكاديمى ممتازة جدا جدا انا بنتى كانت فيها بس عشان غيرت سكنى نقلتها وتعبانة جدا عشان مش لاقية مدرسة على نفس المستوى بجد مدرسة حلوة فى كل شئ ومش غالية جدا بس انشطتها ممتازة واللغة جامدة جدا لان مدرسينها اجانب

رويال اكاديمى على طريق المريوطيه. كجى1 مصاريفها بالكتب يعنى من 4500 الى5000 والباص بيبدامن 1000 على حسب سكنك بس ورقمها33814376

الدراسة فيها جميلة جدا لان المدرسات جميعا اجانب يعنى ضمان اللغة كويس جدا وشغلهم فى ال  Class مشغلين دايما الطفل وبالنسبة للواجبات بياخدو شتات كتير عشان يكونوا دايما شغالين يعنى ممتازة من كلة وادارة زى الفل

انا بنتى دخلت المدرسة كان سنها سنتان و3 شهور دخلت  Nersery اللى هى الحضانة وبعدين السنة اللى بعديها دخلت pree school لان سنها كان 3 سنين و8 شهور اللى هى مرحلة قبل الكجى وبعدين انا نقلت سكنى من الهرم الى القاهرة الجديدة فخفت من المشوار على البنت يعنى قعدت فيها سنتين اما بالنسبة للغة فكانت ممتازة لانها اتعودت من الاول على نظام اللغة عندهم وانا كان كلامى معاها فى البيت  English اما المدرسات انا روحت كتير فى معظم ايام السنة الدراسية كانو المدرسين فعلا اجانب اما مدرسات اللغة العربية فكانو طبعا مصريات

 

جميلة جدا كانشطة البنت كانت ممتازة فى اللغة بجد وكانت حبة المدرسة ومدرسينها فالغة كانت ممتازة وكمان الأنشطة غير كمان انى كنت بس براجع معاها مراجعة سريعة اوقات كتير ماكنتش بتبقى محتجاها لانها كانت بترجع حافظة كويس كلمات واغانى وكلة بالانجليش

 

Bodamody     05-2008

أنا كلمت رويال اكاديمي سالتهم لازم الطفل اللى بقدم يكون عارف انجليزي كويس قالوا لا حاجات بسيطه وده شغلنا احنا ..

رويال اكاديمي حلوه اصل ملاعبها حلوه وفيها ركوب خيل

 

Omtotro  5 - 2008

انا ابني في مدرسة رويال أكاديمي اللي في المريوطية وللاسف هبتدي ادور على مدرسة تانية لأنهم غلوا المصاريف

المصاريف بالنسبة لمرحلة الابتدائي 5700 جنيه و900 جنيه للكتب و1800 للباص مع العلم اني ساكنة في منطقة حسن محمد يعني مش بعيد قوي عن المدرسة

انا ابني طالع سنة تانية ابتدائي

المدرسين مش كلهم أجانب بس فيهم مدرسين كويسين ومدرسين مش قوي بس الميزة ان الادارة كويسة لو فيه اي مشكلة مع ابنك في الفصل لما تروحيلهم بيهتموا وبيخلوا المدرسة تشرحله تاني الدرس في البريك

وقبل امتحان آخر السنة ادوا الولاد مجموعات تقوية ببلاش الزامية

منهج الانجليزي هوه منهج   bright star ومنهج تاني اسمه moving into english بصراحة كتابين هايلين ووزعوا علينا كتب فيها تدريبات في العربي والانجليزي و math  ده غير الورق اللي بيوزعوه قبل الامتحان بتاع الشهر بيخلوكي مش محتاجة كتاب خارجي كل اسبوع بيبقى في امتحان في العربي والانجليزي وال math 

بالنسبة للأنشطة المدرسة واسعة جدا وملاعبها كبيرة

هي المشكلة فيهم حكاية المصاريف

 

المدرسة جميلة جدا في الكي جي علشان مديرة الكي جي امريكية بتتكلم عربي فبتهتم بالأنشطة والحفلات فهتحبب الولاد في المدرسة انا ابني كان بيبقى زعلان لما يغيب عن المدرسة

الأنشطة ليها مواعيد ثابته في حصة ركوب الحصان مرة في الاسبوع او مرتين مش فاكرة

وحمام السباحة ليه مواعيد بس بيبقى في اول المدرسة بس علشان الجو بيسقع بعد كده فبيبقى مفيش حمام سباحة

وهم مش بيدربوا الأطفال بيلعبوا في الميه وخلاص

وهم بيعملوا نشاط بفلوس للي عايز ياخد حصص في النشطة ده بيبقى يوم واحد في الأسبوع في السباحة والرياضة ب 60 جنيه تقريبا للنشاط الواحد انا دخلت ابني الكاراتية وحسيت انه مستفدش فمدخلتهوش تاني

بالنسبة للغة هتحسي بفرق معاهم هم في التعليم كويسين في حاجه انهم بيدوا التعليم مع اللعب يعني مش هتلاقيهم بياخدوا واجبات كتير بس بتلاقي ابنك حافظ الحاجة فالمجهود اللي بتبذليه مش كتير

ودايما بيخلوا الولاد يتكلموا بالانجليزي في الفصل علشان يدربوا على اللغة كويس ويكتسبوا كلمات جديدة

وبالنسبة للدين مهتمين بيه اذا كان الدين المسيحي أو الإسلامي انا مسلمة وجارتي مسيحية وبنتها مع ابني في المدرسة وبتقول عليهم كويسين

اما بالنسبة للدين الإسلامي فمهتمين جدا بيه السنة ده جابوا مدرس يحفظ الولاد سور كتيرة من جزء عم وعملوله حصة كل أسبوع ابني حفظ لغاية سورة الهمزة

بالنسبة للباص مواعيدهم تحفة لأن مشرفة الباص بيبقى معاها موبايل بترنلك على الموبايل بتاعك قبل اما توصل عندك ب 10 دقايق فتبقي عارفة بالظبط هيجوا امتى

طبعا ساعات بتحصل لخبطة في الأول لغاية أما المشرفة تعرف المكان اللي هترن منه

بالنسبة للمذاكرة فالحمد لله مع ابني انا مكنتش بذاكرله خالص هوه كان بيجي حافظ من المدرسة يعني انا دخلته لغة تانية ألماني وانا معرفش فيه أي حاجه فهو ماشاء الله حافظ كل حاجه ومكنتش براجعله خالص بس هم بياخدوه شفوي في أولى ربنا يسهل السنة الجاية

أنا مجرد بقعد معاه في الواجب وساعات حاجات مببقاش عارفاها كنت بسأله المدرسة شرحتها ازاي هو يقولي علشان اشرحهاله في الواجب واشوفه عمل صح ولا لأ

بس ده بيبقى حسب الطفل لأن فيه زميل لأبني كان استيعابه شويه بطئ فمامته اشتكت فالمديرة خلت المدرسة تهتم بيه فبقى كويس

لكن الحمد ابني وبنت جارتي مشتكيناش من الموضوع ده أولادنا بيرجعوا عارفين يعملوا الواجب وحافظين معظم الدروس

واحلى حاجه انهم بيدوا ورق كتير للمراجعة والامتحان اللي بيعملوه كل اسبوع بيخلي الاولاد حافظين كل حاجه

وعلى فكرة لو كنتي عايزة تقابلي مدرسه الفصل بتروحي لمديرة المدرسة وتقابليها قدامها علشان يمنعوا موضوع الدروس الخصوصية

المدرسة فعلا أسعارها بقت مولعة بس هي كويسه وانا ووالده لسه محتارين ننقله ولا نخليه علشان المميزات اللي قلت عليها

 

ام مريم 2008     6 -2008

مدرسة رويال اكاديمي (برضة وحشة ) و العيال فري اوي هناك سمعت ان البنات بتقعد تتمشي على البسين بالمايوة .... و الابتدائي معقول لكن الاعدادي واقع ...

 

يمكن المدرسة كويسة .... انا مش عارفة ...بس طريقها مزعج اوي ؟؟؟؟ الطريق ضيق وناحية منها ترعة ...يعني خطر شوية ..علشان كدة انا مكنتش محبذاها ... و لما شفتها من 5 سنين ( لما مريم كانت داخلة المدرسة ) بصراحة خفت على بنتي ... و خصوصا ان كان عندها ساعتها 3 سنين و 6 شهور ( يعني بيبي لسة) و كانت المدرسة لسة بتفتح ...فكنت خايفة من الطريق و خايفة اجرب مدرسة جديدة لسة معندهاش سمعة و خبرة في الناحية التعليمية ....

 

Omtotro    06-2008

احنا قررنا اننا نخلي ابننا في مدرسة رويال اكاديمي لأن المدرسة كويسة ومش عارفين لو اتنقل منها هنلاقي واحدة كويسة كده ولا لأ

 

زقزوقه 9-4-2009

رويال أكاديمي حلوة قوي و مساحتها كبيرة جدا ، و تعاملهم كويس جدا وبصراحة الكل بيشكر فيها و في مستواها التعليمي ، و مصاريفها حوالي 7000 بدون الباص و اليونيفورم. وسمعت ان المستوى التعليمي فيها كويس ، بس هم بياخدوا منهج برايت ستار

 

ام جوري 9-4-2009

رويال أكاديمى سمعت ان الترفيه فيها أكتر من التعليم وواحدة صاحبتى نقلت بنتها السنة اللى فاتت منها

 

عبير 10-4-2009

 

رويال ماكنتيش بتعجبنى الادارة فى دلعها الزيادة اوىىى لاولياء الامور وانها كانت بتخليهم يدخلوا فى كل شء لدرجة ان الولاد عرفوا كدة ولو ولد منهم مدرسة عنفته فى يوم لتقصيره مثلا او لسلوك مشين يخلى باباه يطلب من المدرسة انه يمشى المدرسة او على الاقل ماتديش ابنه فى الكلاس و كان كلامه بيمشى ودا حصل مع مدرسة اولى عربى وسنها فوق الاربعين لانها عنفت(مش ضربت) طبعا لازم يكون فيه تواصل بين الادارة وبين المدرسة بس مش لدرجة الدلع دا من ناحية تانية كانت المدرسة مهتمة اوى بالأنشطة والحفلات والفن دايز على حساب الدراسة وكل دا عشان تبسط الاولاد واخر حاجة الاهتمام بالدين كان مافيش والحرية الزايدة بالنسبة للاولاد والبنات يعنى فيه مشهد ضايقنى جدا وكانت بنت فى ثانوى لابسة مايوه وبتتمشى على البسين فى رمضان فكنت حاسة انى فى نادى مش مدرسة دا بالتفصيل اللى كان بيضايقنى جدا

 

فيه حد بيكون اهم حاجة عنده الشكل ومش مشكلة المضمون ودا بينطبق مثلا على رويال اكاديمى

هى منظر بس وانا بئول الكلام دا عن ثقة لانى اشتغلت فيها فترة

تلائى هناك كل وسائل الترفيه اللى الكى جى محتاجه وكمان هناك مديرة للكى جى اجنبية اسمها على ما اتذكر اجنيس واعتقد انها لسة موجودة كانت شديدة وممشية الموضوع صح فى الكى جى بس وقت مانا كنت موجودة ماكنش المدرسين اجانب كانت المديرة بس والمدرسين مصريين عادىيين

وكانت مهتمة بيه وعشان كمان كىجى مافيهوش تعليم بمعنى الكلمة فيه دلع اكتر فهم قايمين بالواجب فيه

 

وبالنسبة للمراحل بعد كدة كله مصرى عادى من مدير لمدرس

 

انا كل كلامى ونقدى على رويال كان كله منصب على المراحل الى ما بعد الكى جى لان دول اللى احتكيت بيهم

 

باالنسبة للاهمال بصراحة لا ماكنش فيه اهمال كان فيه مشرفات على طول واخدين بالهم مع الولاد

 

بس طبعا حاجات عادية ممكن تحصل فى اى مدرسة وخصوصا فى السن الكبير شوية لانهم بيبئو اعنف فى لعبهم زى ان الولد يقع على ركبته وهو بيلعب ودا عادى بس مع اللاطفال الصغيرة بصراحة ماشفتش

 

المدرسيين بيتغيروا يعنى ممكن يكون اتغيرو كذا مرة من وقت منا سيبت المدسة بس المشكلة فى الادارة بئى اللى ماسكة المدرسة واللى مش بتتغير لانهم اصحاب المدرسة

 

ووقت مانا كنت موجودة كان مستوى الولاد الاخلاقى حاجة فى مستوى وحش جدا والله والله والله يا جماعة واقعة حصلت لما كنت هناك

 

ان مدرسة انجليش عثرت بالصدفة على برشام منع الحمل مع تلميذة بالاعداى واخدته منها

 

وانا شوفت بنفسى داخل الحمامات بتاعة البنات روسومات سورىى يعنى قليلة الحياء لذلك قفلت منها جدا

 

هى دى الحاجات اللى فاكراها ليهم

 

طبعا بالدين لا مافيش اى اهتمام هو منهج الحكومة بس ومافيش اى حاجة تانية وماكنش هناك مسجد للصلاة

رغم انه كان فيه كل حاجة حتى الخيل

 

والفصل بين الولاد والبنات مافيش لحد ثانوى هم مع بعض على طول

 

بس هى شكلا واووووووووو

 

الحاجت دى حصلت فعلا وانا هناك بس ممكن يكون الوضع اتغير وبئى يستنضفوا مثلا فى المستويات اللى بيقبلوها بس دا حصل بالحرف وانا هناك

 

بس ممكن الناس دلؤتى تسال اولياء الامور الوضع عامل ايه ممكن تكون الادارة غيرت سياسيتها

 

اودي   2009

انا روحت رويال أكاديمي وشفتها لأن فيه واحده صحبه صحبتي مدخله ابنها هناك

وبتشكر فيها جدا وهو في (Kg1) وبتمدح فيها تعليميا بس فى عده نقاط ...

 

*** *** *** *** *** *** ***

 

اولا : المصاريف:

- شامله الكتب= 6300

- الباص = 1600: 2000

- الفصل = 18: 20

 

ثانيا: (Kg) متقدريش يبان منه حاجه لانه معظمه لعب ... فالطفل اكيد بيجي سعيد ومبسوط

 

ثالثا: المساحه والانشطه:

مدرسه كبيره وواسعه وفعلا دي ميزه كبيره للاطفال عشان ينطلقوا وميحسوش بقيود ومع ذلك سمعت ان المدرسه مش مستغله المساحات دي كويس

- وجهتها حلوه والاعمال الفنيه للاطفال جميله جدا انا شفتها فمن الواضح هما بيهتموا بالجانب ده لان الاعمال الفنيه روعه فكروني بمدرستي في ابتدائي في السعوديه كان فيها اهتمام البنواحي دي قوي.

- الفصول حسيت انها عاديه مش روعه عادي حسه انها زي فصول مدرسه باقل من تكاليفها

- فيها 2 بسين وخيل تقريبا حصنين ثلاثه.

 

رابعا: المستوى الاخلاقي:

انا معرفش عنه حاجه بس عبير قالت بعض ملاحظتها.

 

وكمان عبير ذكرت قبل كده ان كان فيه بنت في رمضان من ثانوي لابسه مايوه هل ده كان عادي في المدرسه هل هم بيسمحوا بكده لاولاد وبنات ثانوي خصوصا هل السباحه بتبقى مشتركه ياريت يا عبير تردي علينا في الموضوع ده عشان تحصل افاده.

- انا برده البنت الل عملتلنا التور كان لبسها مش كويس، ومش محجبه ممكن بالنسبه لناس كثير عادي بس بالنسبالي اللبس خصوصا بنطلون جينز ديق وشميز قصير وكانت حطه وشم على اديها (ذراعها من فوق )هو ممكن مش وشم ممكن بالحنه لانه كان بني بس انا محبتش ان ابني او بنتي تجيلي في يوم تقولي اعمليلي زي ميس فلانه.

 

خامسا: هيئة التدريس:

(Kg1): مدرسات مصريات.

(Kg2): مدرسات أجانب.

وانا شفت فيها وحده شكلها فلبيني كوري حاجه من كده.

وفيه تعليق اتقال لنا من مدير مدرسه (نوبل) انهم روسين لان الامريكن والكندي هما اغلى حاجه

 

اخر ميعاد للتقديم كانو قالولنا اخر شهر 4

 

ام بيسو   2009

اودى تقريرك جميل ومفصل بس انا حبيت اضيف حاجات عليه بعد اذنك بالنسبه لرويال اكاديمى فعلا من ناحيه الاثاث والدهان الحائط متواضعه ده بسبب اانها قديمه شويه بس من ناحيه وسائل الايضاح المتعلقه على الحائط احسن بكتير من بلوم واضح من الوسائل ان عندهم خرجين رياض اطفال او تربيه طفوله وده كمان مفتقداه بلوم تانيا الاجانب الى شوفتهم فى الحفله شكلهم من اوربا انا شوفت اتنين باطفلهم اما المدرسات والمشرفات والى فى الرسبشن انا بصراحه ماشوفتش الى انتى قولتى عليها كلهم لابسين عادى مش ضيق اوى ولا على اديهم وشم

 

حتى الى عملتلى تور فى المدرسه كانت محجبه والى قاعدين فى الرسبشن اغلبهم محجبيين ده الى انا شوفته يوم الحفله وبالنسبه للغة المدرسات هناك جوزى اصر يكلم واحده فيهم انجليزى وعجبوه طريقه نطقها . وقال نفس كلامك يا اودى ان فى مصريين نطقهم فى الانجليزى جميل انا بس قولت اقلول الى عارفه بامانهرويال عجبانى علشان مفيهاش غسيل سنان والدلع الى يودى فى داهيه وطلابتهم معقوله كراريس قصه مش بزل وحتى واخدين بالهم من ناحيه الاكل محدش يجيب طبيخ مكرونه سندوتشات وبس وحتى لوبعتى ابنك بفلوس تحطيها فى كراسه المتابعه علشان ما تضعش كل ده يدل على خبرتهم انا ابنى أكل مكرونه من زميله فى بلوم والمشرفه هى الى اكلتهالوه (ضايعين)

 

انا روحت رويال كان فى حفله اخر السنه بصراحه ماشوفتش فى اختلاط جامد بين الاولاد والبنات وكانت شلل البنات واقفه لوحدها والاولاد واقفين لوحدهم حتى لما شله بنات بداوا يرقصوا على الاغانى كانت فيه مشرفه وافقه وبصتلهم راحوا واقفين يصقفوا وبطلوا يرقصوا وشوفت بردوا كان فى استعراضات وكان فى شلة اولاد واقفين كلموا البنات البنات مردوش عليهم وكمان السنه ديه فى فصول لبنات لواحدها واولاد لوحدها ديه الحفله كان فيها كريم ابو زيد ونادى رؤيه كان هناك باين علشان الخيل وابوشقره وكان فيه بوفيه مفتوح حسيت انى فى ستى ستار مش مدرسه بس الى قلقنى منهم كان فى مرجيحه مكسوره وسيبنها بس غير كده المدرسه نضيفه وريحتها ديتول وفيها مدرسين اجانب ومديره الكى جى اجنبيه مودبه وسريعه الحركه نشيطه وشوفت الكتب فى الكلاس الاطفال حلين فيها باين فى شغل

 

لماكنت قاعده مع مديره الكى جى دخلت علينا بنت من المشتركين فى الحفله لانها كانت لابسه لبس نشاط واتكلمت مع المديره انجليزى خلتنى لفيت اشوف مين بيتكلم لقيتها بنت بكتير فى اولى اعدادى انا ما فهمتش لان عندى الانجليزى بعافيه بس جوزى ترجملى البنت بتقولها ايه انا حسيت انى ارمى روحى فى النيل احسن بس برده مضايقنى المرجيحه المكسوره  J

 

UMGOUDY   2009

رحنا مدرسة رويال اكاديمي

ياجماعة أنتوا مش معايا أن طريق رويال بعيد جدا علي أطفال في kg أحنا فضلنا ماشين مسافة كبيرة قوي قوي في اخر طريق سقارة وبعدين الطريق كلة اصلاحات في أوله وبعدين بتفضلوا ماشيين جنب ترعة في طريق ضيق وجنبك تريلات ونقل ماشي معاكي وبعدين في وقت الدراسة الطريق هيبقي بصراحةزحمة جدا يعني هيتاخروا في الرجوع انا فضلت ماشية لحد ماوصلت للمدرسة لقيته مش مريح رجعت تاني ومادخلتش المدرسة اساسا.

 

 أمل   4-2010

 بعد اذنكم انا هرد علييكم انا ابنى فى كى جى والأستااذة الى كانت بتشتغل هناك ردى عليكى انه فى مسجد وكل يوم المدرسه بتاخد الأطفال يتوضوا ويصلوا وان حضرتك دخلتى الحمام لقيتى على الحيطه حاجات مش كويسه مينفعش لأن كل حمام فيه 2 دادة  وبالنسبه للأستاذه الى كان معاها مشرفة مش عجبها لابسها أولا مش عيب انها متكونش محجبه وبصراحه انا مشفتش واحده بالمواصفات دى المدرسه حلوة جدا مهتمه بالأولاد لدرجه ان فى ناس كثير اوى من مدارس نقلوا من مدارسهم لرويال 


merehan    أكتوبر 2010

المدرسة انا جربتها فى preeschools كانت ممتازة بس مرحلة الابتدائى لسة بصراحة معرفش المدرسة فيها انشطة كتير وواسعة وملاعبها كبيرة

fahd 2010 ديسمبر 2010

ابنى فى مدرسة مودرن نارمر بالدقى فى كجى 1 ومستواها مش عاجبنى فبفكر انقلهله فى رويال اكاديمى فارجو الافادة ضرورى ويارت تعرفونى كل حاجة عنها من مصاريف ومستوى تعليمى وهو الاهم وكل شئ للضرورة القصوى

 



إدخل تعليقك ورأيك فى المدرسه