مدرسة المصريه الدوليه للغات

مدرسة المصريه الدوليه للغات
 The Egyptian International Language schools
 
العنوان: شارع المجزر الالى متفرع من شارع اللبينى – المريوطيه - الهرم

التليفون: 33888351  -  37711646

http://www.eis.edu.eg
http://www.facebook.com/group.php?gid=69144562083

المصاريف:
كى جى بالكتب:3750
الباص: 1200: 2000
الزي:

أراء أولياء الأمور فى المدرسه
 
Yomizo    2009
مدرسه كويسه جدا وبيشكروا فيها كتير اوى هى اسمها  في المريوطيه
انا سالتهم لاقيتهم بياخدوا المصاريف 3600 والباص على حسب المكان
والباكيدج بتاعت الهدوم 500 جنيه للصيفي والشتوى وهدوم الترفيه من محل جلجله في الهرم
وممكن يتقسطوا
والمصاريف بتدفع بالترم بالنص
ومستوى اللي بيشتغلوا هناك كويس اوى
بس انت لو عاوزة تروحى تتفرجى على المدرسه وتتفقي على كل حاجه عاوزة تعرفيها تروحى اى يوم سبت لان السبت بتبقى المدرسه كلها اجازة ماعدا الاداره
لكن لو روحتى اى يوم تانى مش هينفع تتفرجى على المدرسه
هتروحى بس تقابلي حد تعرفي منه استفسراتك
 
Abeerbebo    2009
بصى هى شكلها مش يبهر عشان هى مدرسة قديمة انا عرفت انها من 20 او 25 سنة تقريبا يعنى لو بتدورى على الشكل والابهار مش هتعجبك بس انا سالت واستفسرت عرفت من واحدة مودية 2 م عيالها فيها انهم كويسين ومحترمين وفيه تواصل بين الادارة وبين اولياء الامور ومافيش اى مشاكل وكمان اللى عاجبنى شخصيا فيها اهتمامهم بتحفيظ القران كل سنة بيحفظوا جزء وكمان حرصهم على الصلاة وفيه هناك مسجد وبيزبطوا ميعاد البريك مع صلاة الظهر عشان يقيموه وبالنسبة للمنهج بيدو ماكميلن
وهما فى كىجى1 مش بيدوا كتابة يعنى حاجات بسيطة زى الكتابة على النقط وبيبتدوا كتابة من النص التانى من كىجى2 ودا انا مقتنعة بيه عشان الطفل اعصاب ايديه بتبئى ضعيفة فى السن دا(طبعا كل واحد ليه وجهة نظر) وكمان بحس ان الطفل فى السن دا محتاج للترفيه اكتر من كتابة وهوم ورك وشغل تئييل لانه جاى جاى فبصراحة ققرت انى اتكل على الله ومليت ابلكشن فيها عشان احجز فيها مكان لانى لائيت عليها ضغط شوية
اه ونسيت حاجة وانا بقدم لبنتى فيها لائيت ناس كتير جاين يحولوا من مدارس تانية ليها فحسيت ان ليها سمعة كويسة
زى ماقلت مليت ابليكشن لحد ما تظهر حاجة تقنعنى اكتر بس شكلى كدة هكمل معاهم وهتكل على الله
 
بالنسبة لسعرهم
3750 بالكتب
بالنسبة ليه عشان انا فى اخر فيصل قرب الرماية الباص 1300 وكل منطقة ليها سعر
 
وعلى فكرة هما مش بيعملوا انترفيو بمعنى الانترفيو لا دى دردشة عادية مستر محمد حسين او حسن مش فاكرة هو ذوققق جداااااااااا بيشرحلك سيستم المدرسة وبيدردش بيعرف مثلا انتى خريجة ايه وباباها شغال ايه وكدة ومافيش كمان انترفيو للاولاد
 
طلبونى فى الموارد البشرية يعملوا معاية مقابلة
انا روحت وقابلت بالصدفة هناك مديرة الكى جى عشان كانت ولية امر هناك بتقدم وطلبت انها تشوفها المهم عجبنى طريقة نطقها وهى ست لذيذة وذوق وبتجاوب على كل حاجة
 
المهم وبعد شوية اعدت معاية تيتشر على ما اعتقد اسمها مى هى مدرسة انجيلش لبريمرى اعتقد ممكن
هى بردو نطقها عاجبنى فى الانجليش وقالتلى احنا حبينا نكلم مع حضرتك شوية عشان عرفنا انك مهندسة وكنتى شغالة فى مجال التدريس فحابين نعرف انتى رايك فينا ايه وشايفة ايه العيوب اللى فينا
بصراحة اتفاجئت واحترمتهم شوية زيادة انهم متابعين اولياء الامور ومهتمين يعرفوا اراءهم
 
المهم اتكلمت معها بصراحة وقولتلها لحد دلؤتى العيب اللى شايفاه معاكم ان المكان الديكوراشن بتعتو مش اوى يعنى المبانى قديمة شوية وكدة
قالتلى عشان احنا بئلنا 25 بس احنا بنعمل صيان دورية للمكان وبنبنى ادورار جديدة (ودا فعلا انا شوفته)
 
بس قولتلها هو دا بس. بس انا سمعت عنكم انكم تعليميا كويسين ودينيا ودا الى خلانى اتغاضى عن موضوع السيت اب بتاع المكان
 
وهى اعدت بئى تكلم باستفاضة عن الاساليب التعليمية وان المدرسة عشان بئالها فترة كبيرة فى المجال فعارفين كل السلبيات فيه وبيتحاشوها والكلام بئى الى انتو عارفينه
 
فى النهايه
انا اخترت المصرية لعدة اسباب
 
1-انها قديمة فى المجال من 25 سنة يعنى فيها تقل وخبرة واستقرار
2-اهتمامها بالدين تحفيظ وتجويد جزء سنوى والصلاة بالاولاد فى الظهر مع وجود مسجد
3-سمعتها بالتعليم كويسة اوى اوى ودا طبعا سالت عليه من امهات موجودين فيها لان بنتى لسة كى جى1
4-وجود اكتيفتى فيها ويو سى ماس وسباحة ودا مهم طبعا
5-عجبنى نظامهم والواجهة اللى عاملينها لنفسهم زى اليونيفورم مثلا اللى السكرتارية والمدرسين لابسينه
 
العيوب اللى لائيتها
 
1-مبانيها شوية قديمة (لانها قديمة زى ماذكرت مسبقا)
2-بعيدة عنى شوية لانى فى اخر فيصل وكان فى مدرسة اخرى جنبى مافيهاش اى ميزة غير انها قريبة بس
 
فلائيت كدة ان كفة الحاجت اللى عجبانى غلبت اكتر فتوكلت على الله وقدمت فيها
 
دينا احمد 10-4-2009
انا ولادى فى المصرية الدولية وهى مدرسة ممتازة جدا ومستواها التعليمى ممتاز و هم فعلا مهتمين بالدين والصلاة وهى مدرسة انصح بها للى عايز مستوى تعليمى كويس. بياخدو منهج اورل فى الانجليزى جنب المنهج الاساسى بس هما مش بياخدوا واجبات فيها كتابة كتير يعنى مثلا بيدوهم فى كجى ون الحروف كل حرف بياخدو عليه كلمتين ويكتبوه 3 مرات كابينل وسمول وبيهتمو اكثر ان الطفل يبقى عارف الحرف كويس الاول وبعدين الكتابة بيدوهم بالتدريج واتا ابنى الكبير السنة دى فى اولى ابتدائى وهو بيكتب وبقرا عربى وانجليزى كويس جدا وده المهم
بيدو شيتات بس مش بوكليت وهى بتكون على كل درس فى العربى والماث والانجليزى عن كل يونت وبيدو مراجعة على كل وحدة فى العربى و قبل امتحان الترم كان فى شيتات مراجعة لكل مادة شاملة كل حاجة
اما بالنسبة لللكى جى فهما بيدوا كلمتين على كل حرف + منهج اورال بيدوا فيه كلمات اكتر
بيفصلو الولاد عن البنات من اولى ابتدائى مش من رابعة
بالنسبة للبرايميرى بيبقى فى شيتات بجانب الكراسات الحصة و الواجب وكدة يعنى وهما بيعملو للولاد كل اسبوع quiz فى كل مادة وبيبقى فى املاء للكلمات الجديدةفى الانجليزىكل اسبوع
واى درس بياخدوه فى العربى بيتملوه وده بيخلى الولاد يذاكرو اول باول وبيبقى امتحان الشهر سهل بالنسبة لهم
وطبعا فى امتحانات شهرية وبيدو شيتات مراجعة لكل مادة قبل امتحان الشهر
وبيدوا شيتات مراجعة على كل المنهج فى نصف السنة واخر السنة
فرنساوى من اولى ابتدائى
كثافة الفصل فى حدود 20 22
 
بالنسبة للاكتيفتي فاى لعبة عايز ابنك او بنتك يشترك فيها ده بيبقى خارج المصاريف بس بتكون مصاريفها حاجة بسيطة 50 جنيه فى الشهر تقريبا وغالبا بيكون التمرين يوم السبت بس بالنسبة للبسين او السباحة فهما منزلوش خالص عشان مش بيبقى فى وقت طبعا الدنيا بتبقى برد او مش عارفة هما مطنشين الموضوع ده ليه
بالنسبة للرسم هما بياخدو حصة رسم كل اسبوع بس ده فى البرايميرى
والموسيقى هما بيعملوا حفلة كل سنة فى نهاية لبسنة وطبعا كانو بيدربو الولاد على الاغانى قبلها بس تقريبا السنة دى مش عاملين حفلة لان محدش قالنا عنها حاجة لحد دلوقتى
بالنسبة لمدرسات الانجليزى مستواهم كويس يعنى لحد دلوقت مفيش ملاحظات عليهم بس طبعا بيبقى فى مدرسات اقوى من غيرهم يعنى ممكن يبقى فى مدرسة كويسة و فى مدرسة ممتازة
وهما بيدوهم منهج ساينس من برايميرى ون وهو اورال وامتحانه اورال برضه
مدرسة الفرنساوى ممتازة بتحفظهم كل الكلمات اللى بياخدوها و انا مش بذاكر له فرنساوى خالص
وفعلا هما مش بيبعوا فى الكانتين غير خضروات او فاكهه او عصاير بس وحتى لو الولاد اخدو حلويات معاهم بياخدوها منهم ومش بيخلوهم ياكلوها بس هما مشددين على الموضوع ده فى الكى جى اكتر من برايميرى عشان الولاد ياكلو سندوتشاتهم
 
الحفلات
حفلة العيد الصغير والكبير وبيعرفوهم مراسم الحج
حفلة مولد النبى
حفلة راس السنة الهجرية
حفلة عيد الام
 
يتم فصل الاولاد عن البنات فى الفصول من اولى ابتدائى
من عيوب المدرسة المبانى مش جديدة بس مش وحشة معقولة
مساحة المدرسة مش كبيرة قوى بس فى ملاعب وحمام سباحة صغير بس زى قلته
الباصات عادية مش مكيفة
 
النطق كويس وعلى فكرة حتى مدرسات القران والعربى بيتكلمو معاهم انجليش وده انا شوفتو السنة اللى فاتت كان عيد ميلاد ابنى وعلى فكرة المدرسة اللى بتديهم انجليش اورال مش مصرية كانت اجنبية بس مش عارفة جنسيتها ايه وكانت مش بتتكلم عربى خالص
 
على فكرة من يومين ابنى اللى فى برايميرى قاللى انهم ركبوا لهم شاشات بلازما فى الفصول بس مش عارفة حيستخدموها فى ايه
يا رب اكون عرفت انقلكم الصورة مضبوط وانى اكون افدتكم
 
 
rony_83   2009
واجهة ممتازة يعنى ملبسين المدرسات يونيفورم وقابلنا مدير العلاقات العامة واضح انه اصلا عنده خبرة رهيبة فى المبيعات كلامه كويس جدا قال انه فى اهتمام جامد جدا بالانشطة وبيفضلوا ورا الطالب لحد مايلاقوا هوه بيحب ايه ويدخلوه فريق النشاط الى بيحبه – بيهتموا بالدين بيقول كل سنة الولد يحفظ جزء – ساعة الصلاة المدرسة كلها بتصلى – بيفصلوا الولاد عن البنات من رابعة بس فى نفس المبنى ( فصل فى الفصول )- طبعا قال مش هينفع نتفرج على المدرسة والتور بتكون يوم السبت اما اشوف باباهم قال هيروح يبص عليها
المصاريف 3700 كى جى – 4200 ابتدائى – 1300 باص
 
نورا   2009
انا رحت المصريه
و قابلنا واحد هناك و عمل بريزينتيشن حلو اوى للمدرسه لكن طبعا التور بتبقى يوم السبت
أنطباعى الأول انها ممتازه بس ده راجع بشكل كبير للراجل اللى قابلنا و كلامه و نطقه فى الأنجليش و ده مجرد واجهه للمدرسه
 
عملت interview لبنتى و قالوا النتيجه كمان يومين
شوفت أولياء امور و كان فى ام ليها 3 بنات فى المدرسه واحد برى 3 والتانيه برى 2 و الثالثه بتقدملها كى جى 1 المهم سألتها عن المدرسه قالتلى كويسه هى احسن اللى موجود هنا قعدت اسألها عن السلبيات عن حاجات معجبتهاش قالتلى مفيش حاجه معينه هى كويسه مش فظيعه لكن كويسه. و قالتلى انهم كامستوى تعليمى كويسه و مش بتخنق الأولاد و بتهتم بالأنشطه و خصوصا تحفيظ القرأن و الصلاه
البنت اللى فى برى1 كانت واقفه فسألتها هل بتحبى المدرسه قالتلى لأ قولتلها ليه؟ قالتلى علشان بيجيبوا ميسات بيضربونا!!! قلتلها أزاى كده ضربتك ازاى؟ حكيتلى حكايه طويله جدا فهمت منها انها كانت تقريبا ناسيه كتاب الدين فالميس قرصتها و قالت ان فى ميس تانيه فى موقف تانى ضربتها. المهم انا مكنتش عارفه افهم من البنت كويس الحقيقه بس استغربت من حاجه زى كده!!! المفروض ديه مدرسه محترمه و معاملة الأطفال تبقى راقيه
 
أخترت المصريه للأتى:
* عدد الأمهات اللى اولادهم فيها بقالهم كذا سنه و شكروا فيها كتير
* تعليميا كويسه
* فصل الأولاد عن البنات
* الأهتمام بالصلاه و تحفيظ القرأن و الأهتمام بالأخلاقيات عموما
* تعاون الأداره مع أولياء الأمور و ديه حاجه مهمه بالنسبه لى
* المدرسه نظيفه و لاحمامات نظيفه و الفصول واسعه و جيدة التهويه و مشمسه
* وجود 3 لغات على مراحل سنيه مختلفه
* أهتمامهم بالأنشطه و ان الأولاد بيبقوا فرحانين فى المدرسه
 
الاميرة طماطم   2009
بالنسبة لجولتى فى المصرية ...
طبعا زى ما الاخوات قالوا قبل كدة قابلنا الاستاذ محمد محسن (وهو فعلا واجهه المدرسة) وعملنا برزينتاشن حلو قوى .. وطلعت منه بشوية معلومات زيادة
1 - لو فيه طفلين فى المدرسة بيكون فيه خصم 5% للطفل الثانى
2- بالنسبة للانجلش فى الكى جى بيكون 3 حصص كل يوم 2 ريتن وواحدة اورال المدرسة بتتكلم مع الاطفال انجلش بس وبتعرفهم جمل بسيطة يعنى التعامل مع الاخرين الاكل التحية و ما الى ذلك فى البرى بتتلغى حصة الاورال لان الاولاد بيكونوا اتأسسوا وبتضاف بدها حصة الساينس
3- المدرسة بتدى فرنش اورال من برى 1 وريتن من برى 2 وكمان بيتم اضافة الالمانى فى اولى اعدادى ودى حاجة عجبتنى اوى ان يكون فى 3 لغات
4- انهم بيحاولوا يلاقوا فى الاطفال اى موهبة ولازم كل طفل يشترك جروب (بموافقة ولى الامر طبعا) يعنى موسيقى رسم رياضة و دة فى ايام المدرسة العادية يعنى مش الى باشتراك
5- فيه مستشارين اجانب للادارة لوضع القواعد
 
بعد كدة اخذتنا مدرسة فرنش عملت لنا التور و انا حكيت عن المظهر .. ندخل بقى فى المضمون
- سألت عن طريقة التعامل فى الانشطة
قالت ان الاكتر حاجة ليها جاذبية فريق كرة القدم وفريق الكاراتية وبيتم ممارسة النشاط فى حصص الالعاب والنشاط وده خارج النشاط الى باشتراك لانه بيكون يوم السبت
- الكى جى ليهم كل يوم حصة فى الجاردن و بينزلوا كلاس كلاس
- ان لاب الكمبيوتر ممكن يستخدم فى اللغات بس دة من اول البرايمرى علشان الفوناتكس
- الصلاه اجبارى من اول برايمرى الاولاد مع المدرسين فى الملعب والبنات فى الجامع
- عجبنا موضوع الشاشات البلازمة دة وحسيت ان ممكن يجذب الاطفال
 
اخيرا الى لفت نظرى انا وجوزى فى المدرسة حسينا الناس دى فاهمة بتعمل ايه والادارة منظمة و قوية واعتقد دة بفضل المستشارين الاجانب
 
لكن فيه نقطة عايزة اقولها علشان الامانه لما محمد محسن كان بيتكلم معانا سألته اذا كان فيه مدرسين اجانب وجنسيتهم ايه قال ان كل المدرسين مصرين لكن مش ممكن تفرقهم عن الاجانب لكن الاجانب بيكونوا مستشارييين للمدرسة
لكن لما المدرسة كانت بتفرجنا على المدرسة قالت ان مدرسة الاورال اجنبية مش عارفة مين فيهم صح
وحاجة كمان .. هو قال لنا ان العدد مش ممكن يزيد عن 23 فى الكلاس لكن هى قالت ان اخرهم 25 وفعلا لما دخلت الكلاسس عديت الديسكات لقيتها احيانا بتوصل للـ 13 او 14 ديسك يعنى 26 او 28 طفل
 
بس اعتقد ان المدرسة هى الى صح لانها محتكة اكتر بالاطفال لكن محمد محسن علاقات عامة بس
وعلى فكرة كمان علشان الصورة تكون واضحة انا عديت الكراسى فى فصول جينيس لقيتها ممكن توصل 26
 
دة كل الى انا فاكراه دلوقتى لو افتكرت حاجة تانى حقولكم
 
اه افتكرت حاجة كمان فى المصرية الدولية
هم اكدولى على موضوع الكانتين انه مافيهوش سويتس خالص بس خضار فاكهه زبادى عصير وان السويتس ممنوعة فى الكى جى لكن مش بيقدروا يسيطروا على الاولاد من اول البرايمرى لكن بيحاولوا بردة مايحطوش سويتس بالكانتين
 
وان كمان فيه اسيستانت موجودة فى الكلاس على طول مش بتتغير مهمتها بس ترتيب الكتب فى اماكنها (لكل طفل مكان مكتوب عليه اسمه) وانها تتأكد ان اطفل اكل الساندوتش
 
نتظيم اللغات فيها عجبنى ان اول سنتين بيكونوا انجلش بس علشان مايتخبطوش وبعدين بيبتدى الفرينش من برايمرى ولما يبقى تمام نبتدى المانى من اعدادى .. زالنظام ده صح 100% ..لان بنتى كان عندها فرينش ودويتش من كى جى 1 السنه الى فاتت بس اورال وحسيت انها متلخبطة فتجاهلتهم تماما وركزت معاها على الانجلش
 
فى كمان حاجة انا لاحظتها انهاردة فى المصرية .. وانا خارجة لقيت الباص داخل المدرسة .. قمت رجعت وسألت الامن اذا كان الباص بيدخل ياخد الاولاد من جوة المدرسة ولا هم الى بيخرجوا بره قالى لا طبعا الباص بيدخل ياخد الاولاد من جوه المدرسة و مفيش اى طالب يخرج من المدرسة لوحده و ان على الساعة 2 بيتجمع كل الباصات وعددها 26 باص داخل المدرسة لان الساعة 2.20 بتدخل المشرفة الفصول علشان تجيب الاطفال ويتجمعوا و يركبوا الباص من داخل المدرسة وعلى الساعة 2.40 بالكتير يكون كل الباصات خرجت وطبعا دى حاجة عجبتنى جدا
 
أم جورى      2009 
أنا كنت رايحه أتفرج على المدرسه فى طريقى قابلت و لية أمر ابنها لابس اليونيفورم بتاع المدرسه. قلت أروح أسألها و ده نص الحوار بينى و بينها:
 
بقولها صباح الخير انتى ابنك فى مدرسة المصرية الدولية للغات اللى فى المريوطية
قالت ايوه قلتلها وايه رايك فيها؟
قالتلى قمامة( بالمعنى الدارج العامى للكلمة)طبعا انا تنحت
قلتلها ليه بأة وحشة ليه قالتلى فى كل حاجة كل حاجة زفت( سورى يا جماعة)
والست من الواضح انها مقهورة من المدرسة
قالتلى انا مش لاقية حد كبير للمدرسة دى اكلمه كل واحد عامل فيها كبير
قلتلها ازاى قالت اى مشكلة تحصل مش بلاقى حد كبير يكلمنى كل واحد يكلمنى شوية
قلتلها هو مش فى واحد اسمه سراج ده مسؤل قالت سراج ده ......
ولا بيعمل حاجة
والطريق وحش والمدرسة ديرتى
بقولها بس الطريق مش مشكلة طالما المستوى التعليمى كويس
قالت ولا طريق ولا مستوى تعليمى
هى كانت فى الكى جى روعة ابنها فى المدرسة من كى جى وهو دلوقتى برى 2
قلتلها قوليلى المشاكل بالظبط
قالت الطريق كله غيطان وبقر وده مش مشكلة لانه مش هيقعد فى الطريق بس المشكلة انه عامل ريحة وحشة جداااااااااااااااااا داخل المدرسة والناموس هرى الولاد والولد بييجى من المدرسة ايدية متقطعة من الهرش
ولما رحت واشتكيت قلتلهم لازم تعملوا سلك قالوا حتى لو عملنا سلك الناموس هيدخل ومرضيوش يعملوا !!
وكمان الستاف السنة دى كله وحش ؟؟وقلت لسراج انك جايب استاف زى ......
 
وكمان صاحبتها بنتها فى سنة رابعة تيتشر الساينس بقى يديها درجات وحشة وبيرسم على درس
البنت أخدت عنده درس ومن وقتها بقت تجيب 30 من30
قومت انا استكفيت بصراحة من الكلام اللى سمعته منها قلت ادخل على الولد
قلتله انت فى سنة كام يا حبيبى والولد ما شاء اله عسول جدا وزى القمر
قالى فى سنة تانية !!!مش برى 2
قلت له انت مش مبسوط فى المدرسة؟ قالى لأ يا طنط خالص انا الحمد لله فاضلى انهاردة وبكرة وامشى منها دى وحشة أوى
قلتله طيب ايه اكتر حاجة بتضايقك فى المدرسة؟
قاللى ان التيتشر بتدخل الكلاس الصبح من غير ما الولاد يعملوا حاجة تقول اقفوا وارفعوا ايديكم
بينى وبين نفسى قلت ممكن بيتشاقوا فى اللاين بس برضه مش مبرر
وكمان الولد بيتكلم بأسلوب عادى جدااااااااا سنة تانية والطابور مش اللاين ده اللى لاحظته
المهم قلتلوا فى ضرب عندكم فى المدرسة؟ لقيت ماماته بكل حرقة قالتلى ضرب ده بالحديدة
اتصدمت صدمة عمرى قلتلتها يا خبر معقول ورحت موجهة كلامى للولد
قاللى اه قلتله طيب ليه ؟؟ مين اللى ببيتضرب ؟
قاللى اللى مش عامل الواجب (مش الهوم وورك)أو اللى بيتشاقى
قلتله طيب انت اضربت قبل كدة قاللى لان أنا مش بتضرب
باين انه شاطر
قلتله طيب مين اللى بيضرب بالحديدة؟ قالى مستر سراج
قلتله بيضرب ازاى قاللى على الايد
قلتله طيب فى تيتشر بيضربوا قالى اه
اللى مش عامل الواجب بيتضرب والسوبر فيزور بتضرب بخشبة اللى بيتشاقى
قلتله اسمها ايه؟ قاللى عبير
قلتلها طيب والشيتات بيحلوا معاهم
قالت لأ والواجبات كتيرة
لدرجة ان الويك اند يوم الخميس الواجب كتير جدا وبنقعد نعمل فيه خميس وجمعة
ومرة كنت تعبانه بعت اعتذار فى الفولو اب انى ما قدرتش اعمل الواجب راحوا فى نفس اليوم
قمة قلة الذوق عملوا علامات استفهام واين الواجب وارجو الاهتمام وطبعا اتغظت جدااااااااا لأنى بعتالهم اعتذار
وكمان معاملتهم لأولياء الأمور سيئة لدرجة انى رحت المدرسة مرة ومعايا ابنى الصغير وطلبت ادخل التويلت ما رضيتش تدخلنى وتقولى ممنوع ولما اعترضت قالت هاتى الولد انا ادخله
قلتلها فى رحلات انا طبعا مش عايزة اعرف حاجة تانى بس قلت الم الموضوع كله قالت رحلات (......) ده جنينة الحيوانات عاملينها ب25 جنيه وبالباص بتاع المدرسة.
 
BIBOOO     2009 
اية ياجماعة الكلام المرعب ده عن المصرية علي فكرة انا رحتها الاسبوع اللي فات اول حاجة قابلنا مستر محمد وحاسيت انه واجهة مشرفة للمدرسة بس بيتكلم بسرعة جدا وبعد كدة اتفرجنا علي المدرسة النقاط اللي معجبتنيش هي.
مفيش مراوح في الفصول "لان طبعا ممكن يبقي في ذباب اوناموس علي الاقل التهوية حتكون كويسةوخصوصا ان الصيف  بيبقي لخر شهر11
 الجاردن صغيرة جدا ويوجد 6فصول كجى 1 و6فصول كجي 2
 
الالعاب في الجاردن معظمها حديد مش بلاستيك اوخشب +سور الجاردن والباب بتاعة حديد برضة مما يشكل خطورة مع تدافع   الاطفال.
 
عدد الالعاب قليل جدا
مشفناش غرفة الرسم او الموسيقي
دخلنا تاني انا وزوجي عند مستر محمد وقلنالة علي الكلام ده والمهم انة عنده تفسيرات لكل حاجة المراوح غير ضرورية بالمرة حيث ان تصميم المدرسة راعي تهوية الفصول وان الجاردن مساحتها كويسة وان الاطفال بينزلوا فصل فصل طيب لو كده يبق محتاجين 6 او 7 ساعات علشان يلعبوا كل الفصول بالنسبة للالعاب قالي في مشرفين مع الاطفال علشان محدش يقع وقلناله ان الارض بتاعتها كلها رمل وهتبهدل الاطفال كده قالي ده احسن من النجيلة
 
انا قابلت ولية امر في المصرية علي فكرة وكانت جاية تقدم لابنها الثاني في المدرسة وكان معاها بنتها الكبيرة في 3 وشكرت في المدرسة جدا وقالتلي ان المجهود اللي بتعمله مع بنتها قليل جدا البنت ماشاء اللة علية مؤدبة ورقيقة اسلوب كلامها مع ممامتها حلوجدا
بالنسبة لموضوع النظافة الحمامات كانت نظيفة جدا والفصول كمان
 
Dinahahmed     2009 
بصوا انا سالت ابنى عن موضوع الناموس ده قالى لا يا ماما انا عمرى ماشوفت ناموس خالص فى المدرسة وسالته كمان عن موضوع الريحة اللى عمرى برضه فى اى مرة رحت فيها قالى برضه لا عمرى ما شميت ريحة
و سالته كمان عن موضوع الضرب تانى قلته هو لما بيبقى فيه حد متعاقب بيروح لمستر سراج قالى لا قلت له امال بيروح لمين قالى ممكن لميس عبير
قلته حد بيضرب بحديدة ؟؟ قالى ايه حديدة لا بس ممكن الميس تضربه بس مش عارف ازاى عشان عمرى ما اتضربت
وبالنسبة لموضوع انه بيتكلم عربى زى واجب و الطابور
ده على حسب امه ما معوداه
يعنى ابنى اللى فى كى جى واللى فى برايميرى دايما بيقولو يالا ياماما عشان نعمل الهوم ورك
انا كنت واقف فى اللاين النهاردة الكلاس بتاعنا كذا عمرى ما سمعت كلمة طابور دى منهم
 
انا مش بدافع عن المدرسة بس بقول اللى انا شايفاه ومجرباه بقالى 3 سنين
كمان انا لما كنت بدور على مدرسة عرفتها عن طريق واحدة مرات صاحب جوزى بنتها دلوقتى فى برايميرى 3 وكانت بتشكر لى فى المدرسة و هية لسة مدخلة بنتها التانية السنة دى برايميرى 1 يعنى لو هية حسة بمشكلة من المدرسة مكنتش دخلت التانية
وجوزها مع جوزى فى الشغل عمرى ما سمعت انه اشتكى من حاجة من المدرسة
بالنسبة للجاردن بيبقوا عاملين ليه حصة فى الجدول يعنى مش قى وقت البريك فكل فصل فعلا بيبقى فى وقت مختلف
وقت البريك للكى جى بياكلو فيه بس
 
اى مدرسة لازم يكون فيها سلبيات وايجابيات
و مش ممكن يكون كل الناس مبسوطين لازم هيكون فى ناس عندها مشاكل بس انا شايفة ان الست دى مزوداها قوى
وبعدين هية سايبة الولد ليه 4 سنين لما هية مدرسة زفت اوى كدة
انا فعلا حاسة انها بتتكلم عن حاجات عمرى ما سمعت عنها ولا ولادى اشتكوا منها
بالعكس الولاد بيحبوا المدرسة و انا شايفة انها من المدارس الكويسة اللى عندهم ضمير وبيعلموا الولاد بجد
 
انا اعرف واحدة عندها بنتين واحدة فى برايميرى 3 وواحدة فى كى جى بس مسمعتش منها اى شكاوى
بس انا مش على اتصال بيها قوى بس هية لسة مدخلة بنتها السنة دى كى جى ون ومش بتفكر تنقلهم ولا حاجة فلو كان عندها مشكلة مكنتش دخلت التانية السنة دى
 
نورا      2009 
أنا متهيألى ان الست اللى قابلت ام جورى ديه يا جماعه بتتكلم عن مدرسه تانيه
 
أصل المدرسه ديه انا روحتها 4 مرات و كل مره بقعد مش أقل من نصف ساعه لا عمرى شميت ريحه و حشه و لا شوفت ناموسه و بعدين هى مش محاطه بالبقر زى ما هى بتقول + ان الأم اللى شوفتها ليها 3 بنات فى المدرسه واحده منهم برى 3 و شكرتلى فى المدرسه جدا و كانت جايه تدفع مصاريف السنه الجديده لأولادها و بعدين الحمامات نظيفه جدا و بنتى دخلت الحمام و انا كمان دخلت الحمام براحتى خالص و الفصول كانت واسعه و نظيفه و جيدة التهويه و الأضاءه و الناس هناك ذوق جدا صعب اوى ان كل ده يبقى تمثيل على كل الناس ديه
انا الحقيقه صليت استخاره و شايفه ان المدرسه ديه هى المناسبه + كمان ان عندهم 5 فصول كى جى لو سمعتهم وحشه كده مكنوش لاقوا حد يدخل كى جى و يحتاجوا 5 فصول خصوصا ان حواليهم مدارس منافسه كتير و ارخص منهم فى الأسعار
 
رأى و لى أمر      2009 
المدرسة مستواها التعليمي كويس جدا ، بس المشكلة ان المدرسين بيتغيرو كتير جدا
وصل تغير المدرسين لدى احد الفصول الى 4مدرسين في السنة
 
رأى و لى أمر      2009 
مميزات عجبتني:
1- فصل الأولاد عن البنات من سنه 4 ابتدائي.
2- تحفيظ جزء من القران كل سنه.
3- الصلاه اليوميه.
4- المديره انا معرفهاش لكن اهتميت اني اسأل عليها وأسل على تخصصها. فهي دكتوراه في الاقتصاد الاسلامي + منقبه فنحسبها على خير انشاء الله.
 
وفيه حجات بسيطه وممكن تداركها معجبتنيش:
1- ان موقعهم web site واقع ومش موجود ... فيه مشاكل.
2- عدم سماحهم لي بالفرجه على المدرسه وذلك لاستحاله المجيئ يوم السبت (بس برده احترمهم لانها سياسة مدرسه).
 
رئيس مجلس الاداره فى المدرسه ميس نظلي جامعه امريكيه سياسه واقتصاد ودراسات اسلاميه ودكتوراه في الاقتصاد الاسلامي
 
فى ملعب كره بانواعها، جاردن للكيجي فيه العاب متنوعه صغير نسبيا بس هما بينزلو فصل فصل عشان الامان وعشان صغر المكان، حمام سباحه، المزرعه اللي أمام المدرسه تبعها وبيقدموا نشاط حلو للأولاد بحيث بيودوهم ويعرفوهم عملي متطلبات الزراعه بالانجلش بالاضافه الى 1- الزراعه عملي 2- مراقبه المحصول 3- الحصاد والاولاد بيفرحو كتير لما بيلاقو المحصول ويخدوه معاهم للبيت (زرعو فول حيراتي، بطاطا، كرنب) بس الكرنب فيه اولياء الامور هما اللي جم أخدوه عشان ثقيل، بيعلموهم الاعتماد على النفس ومعرفه البيئه المحيطه عملي.
فى مكان مخصص لكل طالب موضوع فيها شنطه باسم الطفل مكتوب عليها المدارس المصريه الدوليه. الكتب بتتجلد بتجليد شفاف مكتوب عليها اسم الطفل، بيحط كل حاجه في المدرسه وبيرجع بس بالشيت. عشان ميتعبش من شيل الشنطه.
بيطلبوا للولد غيار اضافى عشان لو حصل اى حاجة طارئة يغيروا لهم
كل فصل فيه Teacher ومشرفه بتقعد طول اليوم مع الاطفال ملهاش دعوه باي مكافأه أو عقاب هي بس للرعايه والـ Teacher للتدريس ومسؤوليه التعليم، وداده تكون خاصه بدخولهم الحمام.
لا يحتفلو الا بالمناسبات الاسلاميه.
فى مسجد للصلاه. يتعودو عليها وعلى الوضوء في السنتين وبعدين يصلو من سنه اولى.
 
اللغه الاولى: الانجليزيه وبيهتمو بالعربيه.
اللغه الثانيه: Primary فرنسي .
اللغه الثالثه: إعدادي الماني.
 
جودى      2009 
انا رحت المدرسة جميلة جدا وبنات محترمة جدا قابلوني وبعدين دخلت قابلت أ/ محمد
من العلاقات العامة شخص محترم جدا اتكلم معانا أنا وجوزي وبنتي عن كل اللي قالتوه هنا بس ماعرفتش اتفرج علي المدرسة عشان كان في امتحانات .
بس في أمن موجود في الحوش عمال يتحرك يمين وشمال كل لما يلاقي اي حاجة مش مظبوطة مثلا البنات بتحاول تخرج من بوابة مقفولة في الملعب
تحسي أن في أشراف كويس في المدرسة وناس مصحصحة لكل حاجة بتحصل في المدرسة
بس كان في ورق ناقص قلتلهم هنيجي يوم السبت ونجيبه وبالمرة نتفرج علي المدرسة.
مشكلة المصرية :- بس أن المباني قديمة شوية
 
نور الشمس      2009 
اعجبت جدا بارائكم عن المدارس وبمساعدتكم اردت ان اكون صديقه معكم في جروب المصريه وبالفعل ذهبت لها وقدمت لبنتي وده لانى حسيت من كلامكم انها تقريبا افضل المدارس التي تجمع بين المستوى العلمي والدين ده بغض النظر عن شكلها
 
أم بيسو      2009 
كنت رايحه اسحب الورق من بلوم وبعد ما سحبته قلت اروح اشوف المصريه من كتر كلامكم عليها.
هو الطريق عمران مش وحش قوى بس ضيق وفيه ارض زراعيه جواميس بس عادى بلوم كانت كده بس طريق بلوم اوسع شويه.
الناس هناك معملتهم كويسه والمدرسه نضيفه والفصول والحمامات وفيه دش فى الحمامات للخارجين من البسين وفيها بسين ولعب الاطفال جميله فيها زحلقه وبيت كور وارنب بيتهز هى مساحه الجاردن ضيق شويه بس مستغله حلو قوى وفيه مدرسه اجنبيه للأورال انجليش
مهتمين بالصلاه: الفسحه بتتحدد على ميعاد الصلاه وبيفرشوا حصر بره الجامع للصلاه.
ممنوع الحلويات والكانتين برضوه ما فيهوش و مشرفه الباص بتاخد الحلويات من الطفل لو وجدت.
ما فيش غسيل أسنان (العقده الى جاتلى) ما فيش طبيخ.وابنى حب المشرفه الى فى الجاردن وما كنش عايز يمشى وبيحفظوا جزء عام فى كى جى ودور البيت مهم معاهم وبيبعتوا فى البيت الشتات تتحل وترجع تانى وكمان الكتب تجلد بجلاد شفاف بيدوا فرنساوى اورال فى اولى ابتدائى والمانى فى اعدادى وثانوى. يختارواحده فيهم بس
انا اعتراضى الوحيد القران كتير جدا كل سنه لازم يخلص جزء ده بجانب بقيه المواد وخصوصا انهم بياخدوا لغتين مع بعض حاسه انه كتير ودور البيت معاهم مهم انا سالت اتنين من اولياء الامور واحده جارتها بنتها فى كى جى قلتلى ان بنتها بتيجى عارفه كل حاجه وسالت ولى امر تانى اولاده فى ابتدائى قالى ان فيه متابعه فى البيت كتير وبيطلوبوا حاجات تتعمل فى البيت تكملها المدرسه والعكس وقال السبب ان العدد كبير بس قال ان عندهم ضمير . وفيه سمرى اسكول للطلابه فقط وبيراجعوا فيه اجزاء القران المحفوظه بجانب الانشطه(السباحه- الكارتيه-السله -كره القدم)وفيه ساوند سستم فى الفصول والفصول كبيره وسوف يكون فى كل فصل جهاز كمبيوتر.

احمد    يوليو 2010
انا اولادى كانوا فى المدرسه برايمرى 2 وبرايمرى 3 ونقلت السنه دى لانى غيرت سكنى الى اكتوبر وعرفت موقعكم الجميل اثناء بحثى عن مدرسه باكتوبر وفوجئت انكم بتشكروا فى المصريه الدوليه الى ظهر لى مستواها الحقيقى بالصدفة من خلال رحلة بحثى عن مدرسه جديدة لاولادى احكى لكم وانتم احكموا
تصوروا اولادى اترفضوا من 3 مدارس لضعف مستواهم فى اللغة واخيرا قبلوا فى مدرسه بعد محاولات عديدة لتحسين مستواهم قبل امتحان القبول للمرة الثانية فى نفس المدرسه
مع العلم ان اولادى كانوا فى المصريه من المتفوقين ودايما بيجيبوا الدرجات النهائية وده معناه حاجة من اثنين يأما المدرسه كانت بتضحك علية او ان هو دة مستوى المتفوقين فيها
 وانا اثناء وجود اولادى فى المصريه ماقبلتنيش هناك مشاكل جبارة و مكانش عندى النيه انى انقل لولا تغير سكنى الى اعتبرة صدفة خير من الف ميعاد علشان الحق اولادى 
انا قلت انبهكم اللهم بلغت اللهم فاشهد

zahraa  أكتوبر 2010
هو مش زي  ماقالت واحدة من اولياء الامور ان ريحتها وحشة وفيها نموس كتير وبيضربوا الاطفال بالحديدة دي مبالغات متخلفة ومش ممكن تحصل ابدا اما بالنسبة ان الولد اتكلم من غير ماينطق بالانجليزي فلأنة في قسم فيها خاص كله عربي مش لغات ممكن تكون هي دخلت ابنها القسم دة لان انا ابني كان بيبي كلاس السنة الي فاتت ولوقتي هو كي جي 1 وعلموه كلمات كتيرة بالانجلش ومش بيعرفها بالعربي فده انا واثقه منه كويس اما بالنسبة انه مافيش حد معين تقدري توجهيله شكوتك فده صح لان بقالي كتير بشتكي من موضوع انه مافيش مروحة في الفصول وهما مصرين انها غلط على صحة الاولاد وانا مصرة ان المروحة بتخلق تيار هواء صحي ونقي للاولاد ولو لقوا انها هتعيهم يبقى يقفلوها بس لازم تكون موجودة وده ابسط حقوق الاطفال في اي مدرسة للحد من انتشار العدوى بس انا مش هسكت وهصعد الموضوع حتى لو وصل اني اشتكيهم في وزارة التربية والتعليم وربنا يسهل.

Hassan  أكتوبر 2010
قراءت تعليقات بعض من أولياء الأمور وإندهشت من التعليقات وأحسست إني في مجلش الشعب ومظاهرت تأييد للحكومة مثلاً.
الواقع مختلف تماما المدرسة بلا إدارة اللهم إلا الإدارة المالية فهي الوحيدة المهتمة بجذب لأكبر قدر من الأموال للمدرسة.
ويكفي أنك لا تعلم من يدير المدرسة ( الأستاذ سراج - والدة الأستاذ سراج - اللواء حسن - العفميد حسن - العقيد مجدي الأستاذ علي - الأستاذ وليد -...........)وغيرهم كثير
أما عن الناحية التعليمية فحدث ولا حرج أكتشفت أن معظم المدرسين الأكفاء يرحلوا إلي مدارس أخري لضعف المقابل المادي.
الشرح شبة معدوم تجد مكتوب أنهم أخذوذ درس معين وتسأل الطفل تجد أن المدرسة لم تحضر المدرسة في هذا اليوم والمسألة ورقيات لا أكثر وعند الشكوي الإجابة أنتظرو أسبوعين علي الأكثر وستجدوا مايسركم ويبدو أننا لن نري نهائي.
أكتشفوا وجود مشاكل عديدة بدل من مناقشتها مع أولياء الأمور في مجلس الأباء تم إلغاء مجلس الأباء منعاً لوجع الدماغ.
الخلاصة أنهم ملتزمون في تحصيل الماليات فقد والباقي مش مهم لن يؤثر علي سير العملية التعليمية!!!!!!
يكفي أنك إن واجهتك مششكلة ما عليك بالذهاب للمدرسة وأخذ ميعاد بعد أربعة أيام ومحدد الزمن فإن حضرت بعد ميعادك بربع ساعة عليك أخذ ميعاد جديد ومش مهم المشكلة المهم النظام!!!!!!!!!!!!!!!!!!!!!
أكتشفت أن هناك مدارس قريبة من هذة المدرسة تزيد التكاليف فيها حوالي ألف جنية لكن  هناك فرق كبير نظام ودراسة وكتب خاصة بالمدرسة فإكتشفت إنها أرخص في مجملها فقررت تحويل أولادي كم كنت أخشي أن يكون قرار إنفعالي وأكتشفت أنه قرار متأخر جداً جداً جداً.

محمود احمد  يناير 2011
جيدة من الناحية التعليمية ولكن من ناحيه الادارة مش كويس

 ولية أمر 2011  مايو 2011
مدرسة زي الزفت والناس في الادارة هناك غير محترمين بالمرة ولسانهم طويل
ده بالاضافه انهم بياخدوا مصاريف زياده جدا عن المقرر ليهم من قبل الادراة التعليمية والوزارة الضعف تقريبا
عدم احترام أولياء الأمور وضعف مستوى الأولاد فيها أنا ابني بقاله 3 سنين في المدرسة ولا كأنه دخل مدرسة لا بيعرف يقرأ ولا بيكتب ده بالضافه لقبولهم لأطفال منغل وعدم وضع اشراف عليهم
وكثيررررررررررررررررر قوي واللي عايز يعرف عنها حاجه ياريت يروح لغاية الادارة التعليمية بفيصل ويسأل عنهم ويحكم بنفسه بعد كده
ده بالاضافه ان قدمت فيهم شكوى أعرف صحة المصاريف اللي بيقولوا عليها من عدمه وعرفت ان أولياء أمور كثير عملوا كده وبعد كده سحبوا شكوتهم بعد ما اتهددوا من المدرسة انهم يسقطوا ولادهم وده غير حاجات كثيييير ثانية وكمان اعملوا سيرش عليها على الانترنت واسمعوا بقى المهازل اللي عليها
مافيش غير كلمة واحده أقدر أقولها عليهم غير حسبي الله ونعم الوكيل فيهم ربنا هياخد حقي منهم أكيد



 

إدخل تعليقك ورأيك فى المدرسه