مدرسة بلووم للغات

 

مدرسة بلووم  للغات

Bloom Language School

 

العنوان: طريق المريوطية - الهرم

التليفون: 33853622- 33854625- 33858252 

المصاريف:

         

        الباص:

        الزي:


أراء أولياء الأمور فى المدرسه :

  

ايمو  06-2008

انا رحتها و لفيت فيها و الاهالى كانوا مبسوطين منها اوى برغم انها جديده

هى سيمى انترناشيونال و بيهتموا اوى بالدين و فيها تحفيظ قران

 

sherein35  2008

أنا استفدت منكم جدا يا جماعه و أتمني تساعدوني في حيرتي أنا باقدم لأبني kg 1 انا من سكان المهندسين و مش عاجبني أي مدرسه هنا ,,المهم أنا رحت مدرسة بلوم في سقاره هي سيمي انترناشيونال و عندهم اهتمام بالدين و من خلال مقابلتي أرتحت مع ان المشوار واجع قلبي ,, انا بس محتاجه أعرف رأيكم فيها اذا حد له تجربه أو سمع عن التعليم فيها مستواه ايه

 

ايمو

شيرين بلوم المدرسه كويسه اوى انا اعرف ناس حولوا ليها السنه اللى فاتت و شكروا فيها جدا

 

kouky5

 

bloom schools

بالمريوطية http://www.bloomschool.com/

نظام امريكي

Fees: 10000 L.E.

تعتبر من المدارسة الحلوة وفيها الماني وبيهتموا بالناحية الدينية

في كل المواضيع اللي علي النت االي بتتكلم عن المدارس كلهم بشكروا في مدرسة بلوم وقالوا انها بتهتم الي جانب الناحية التعليمية بالناحية الدينية كمان وهما مبسوطين منها

 

sherein35

انا النهارده عملت الأنترفيو في بلوم و الحمد لله ابني اتقبل المهم انا سمعت من ناس كتير انها مدرسه كويسه اوي و اطمنت و اتأكدت لما رحت بنفسي هي سيمي اانترناشيونال يعني حياخدوا المنهج الناشونال بس الأنجليزي بياخدوا المنهج الأمريكي و مش قادره أوصفلك معاملتهم أد ايه جميله و تربويين و لو رحتي زياره واحده حيشرحوا لك بالتفصيل المهم من كل ده في جامع للصلاه يوميا و تحفيظ القران من kg 1 و المفروض انهم حيفتحوا ال american and britich next year و ده الموقع www.bloomschool.com

سمسمه بالنسبه للأنشطه في بلوم كله موجود علي الموقع و مصاريف المدرسه شامله الأنشطه و خلي بالكم الي حيقدم قبل شهز5 حياخد 10 % تخفيض

 

أولا المنهج الأمريكي عندهم بياخوا في ابتدائى ماكميلان و هارت كورت و ده يخص ال comunication skills يعني جزء علي ما انا فهمت من المنهج الأمريكي و بياخدوا معاه المناهج اللي هي أساس اللغه ذي برايت ستار او بالون اللي في المناهج الناشونال و في kg1 بياخدوا منهج اسمه u can و بياخدوا الفونيتكس

المصاريف في بلوم 7300 و 700 كتب ده قبل شهر 5 بعد 5 حتكون الأسعار العاديه اللي هي 8300 و 700 كتب و 2300 باص

 

رأى و لى امر   4-2009

بلوم قالولى ان مصاريفهم8000 للKG وان عدد التلاميذفى الكلس15

وانهم بيشطرتوا خبرة للمدرسين لا تقل عن 8 سنوات

وان ليهم منهج دين اضافى

ووقت الصلاة المدرسة بتصلى كلها جماعة ودة بسطنى اوى من المدرسةلانهم بيهتموا بالدين

وقالولى كمان انهم بيعملوا ندوات دينية لاولياء الامور

 

أم بيسو

السلام عليكم .انا ابنى فيها وانا اول مره اشارك بس قولت اشارك علشان افيدكم من التجربه المرريره الى حصلتلى فى بلوم اولا لا يهتموا بسلامه الاطفال ولا صحتهم ابنى فى برى

kgاول السنه ماعدش اسبوع معاهم ووقعوا فى البص وكانت عينه حتروح لولا ساتر ربنا وما عرفتش وقع ازاى فى الاول الا لما ولده عمل مشكله جامده ودخل مدير المدرسه فيها .ومديره الحضانه تقولى ايه يعنى ماهوا ممكن يوقع فى البيت

 

 

وكملت برده معاهم وكانت غلطه كنت مفروض امشى بعد كده لقيته فى يوم راجع بزمزميه صاحبه واتصلت بالمشرفه بتاعت البص تقولى انها شربته منها مع ان زمزميته جو الشنطه الهانم كسلت تتلعها وانا و ولده فكرنا ان ممكن يغسلوا سنانه بفرشة واحد زميله زى موضوع الزمزميه وطلبنا منهم الفرشه والمعجون والطبق والكوبايه بتاعة ابنى وفعلا شكنا جه فى محله الفرشه جديده والواد بيجى كل يوم غاسل سنانه من هناك ورغم اننا خدنا الفرشه والمعجون جه برده غاسل سنانه طب ازاىىىىىىىىىىىىىىى وابنى قلى ان (مس روح اغسل سنانك )وولده اشتكى لمدير المدرسه يقولوا ان مديره الحضانه عندها فرش جوه علشان لما فرشه تكسر تكون فى غيرها طب ماهى الفرشه كانت معاكم وجديده بيرد اى رد يخركوا من الموقف وخلاص.مش مهم ولى الامر مقتنع ولا لأ.ده غير ما فيش انشطه خالصصصصصصصصصصصصصص ووخدين فى المصاريف 1000 انشطه ولا يجى بقص ولصق ولا صوره لصقها مع المدرسه ولا حتى ملونها مافيش غير زهريه جه بيها فى عيد الام وكارت وبعد حفلت عيد الام بداوا يصعبوا الكلام قوى الى بيدوه مع الحروف علشان يقولوا ان الواد مش نافع وعايز يعيد وخصوصا ان ابنى صغير حيتم 3ونصفى اول اكتوبر الجاى حرف x اكس راى طب عيل عنده 3 سنين افهمه ازاى اكس راى وسألت ابنى عرفت منه انهم مخدوهاش فى الفصل طب بتبعتيها للبيت ليه؟ولازم تتبعى ابنك وخصوصا لوكان صغير علشان بيهملوا الطفل الصغير وانا الى كنت بقولهم ابنى بيعرف ايه وكمان خبرتهم قليله جدا. انا مشيت خلاص من الرعب كنت حاسه ان ابنى فى الفير فاكتور وخصوصا ان عرفت ان حركت الفرشه ديه ممكن ينقله فيرس سى.

 

هما بجحين وبيدوروا على اى ردود وخلاص وما بيقلوش انهم غلطانين وردهم عليا تدل على انهم ليس لهم خبره فى هذا المجال كمان مدرسه الفصل وقعت فى الكلام ادام المديره الحضانه وقالتلى ان فيه طفل فى الفصل مفروض يكون فى

kg وراحت المديره شخته فيها وقالتلها ما تقوليش كده ففهمت انهم ضحكوا على اهل الطفل وعيده برى لان فى واحده صحبتى مرت بفس هذا الموقف وهو ابنها كويس عيده برى لمصلحته يعنى منهم لله بس مكانتش فى بلوم كانت فى مدرسه فى العبور واتاكدت بعد عيد الام لما بدأوا يصعبوا الكلامات وبعدين اول السنه طلبوا بزل والمفروض المدرسه الى تجيبه مش انا وشرطين 12 قطعه كمان انا رفضت اجيبه وقلتلهم ان انتوا تجيبوا البزل ومعرفوش يرضوا عليا غير بان علشان لما ابنى يعيط يسكتوا بحاجه تكون بتعته وشافها فى البيت طب ابنى بيحب العربيات والبزل الى حشترى مش حيلحق يشوفه هو استغلال وخلاص واى صوره فيها ابنى علشان اخدها ادفع 20 جنيه والحفله عندهم 70 جنيه علشان بيعملوها فى فندق كتراكت علشان المدرسه ديقه طب انا مالى فى كل ده بصراحه حرام فيهم الفلوس ده انا دفعه 8000 وزعلانه وامال لما ادفع السنه الجايه 12000 اعمل ايه اشد شعرى الحمد لله انهم بانوا ده حتى كراسه الفوا اب خلصت استخسروا يبعتوا واحده تانيه وبعته المتابعه فى ورق مفرت وكمان بشرط تبعتى الورق كله كل يوم اصل انا خدامتهم ولا ما دخلى ابنى ببلاش انا بعد هذه التجربه ابو 5 زى ابوا عشره بس الواحد يعقلها و يتوكل على الله لان الى حمى ابنى ربنا انا معرفش حدخل ابنى ايه بس عايزه استناه يكبر علشان ياخد باله شويه من نفسه

 

انا نسيت اقول كمان ان ابنى وقع فى حجرة الرسم واتفتحت شفته ومطلعهوش للممرضه وجالى ابنى وشفته فيها مده وكان ممكن سنه تكسر ويبلعها وعلى فكره انا عرفت ان فى ام مشيت من عندهم وبنتها فى كى جى برضه وحولوا يقنعوها تعقود بس صممت ومشيت وكان ده فى شهر 12 بالنسبه لتعليم انا اهملوا ابنى فى الاول وخصوصا فى العربى علشان كان كلامه قليل ودخل معاهم متاخر وكمان صغير بس مدرسه الانجليزى كانت بتعيد كتير فتعلم منها ولما خد اجازه نص السنه اقعدت معاه وعرفته الالوان وجبتله لعب عليها الحروف الانجليزى والعربى واقعدت طول الشهر الاجازه اذاكره وراحلهم النص التانى حاجه تانيه خالص لما حتى هما ذهلوا وكانوا بيبعته الواجب صعب على الى فى سنه وانا معاه مع تكرار مدرسه الانجليزى بقى يحل الواجب وافتكرونى انا الى بحله واقلتلهم انه بيعمل كذا حاجه وكانوا ما صدقونيش ويمتحنوا وفى العربى انا كنت معاه لوحدى واشتكيت كذا مره بس الحمد لله اتقدم فيه ومن بجحتهم يشكرونى طب انا بعتها المدرسه انتوه تعلموا مش انا .وبيغيروا المدرسين كتير ا فىالنصف الاول كانت فى مدرس اجنبيه ما قاعدتش شهر والنصف التانى واحده تانيه بس التانيه كانت احسن وبدا ابنى ينطق الانجليزى كويس بس مش مضمون تفضل قاعده وخصوصا ان مديرة الكى الجى معملتها للمدرسين ادام والياء الامور مش ظريفه . وكمان ببيخدوش بالهم من تصرفات الاطفال ابنى كان بيرجع متعلم حاجات غريبه وبيقلد زميله وماحدش يقوله عيب مع ان فى مشرفه قاعده على طول معاهم فى الفصل مثلا بقى يحيط ايده فى منخيره يرفع الهدوم ويبين بطنه مع ان ابنى كان ما بيرضاش يلبس نصف كم وكان بيكسف من لقى منكم منكرا فيغيروه حتى لو كان بالكتابه.

 

نسيت اقولك ان البصات بلوم مش بتاعتهم مأجرنها وطبعا ممكن

تتاخر شويه عن ميعاد خروجهم انا ابنى ساعات كان لبيوصل اربعه ونص وهو بيخرج اتنين ونص واشتكيت لان ابنى مره عمل تويلت على نفسه وفعلا غيروا خروج ميعاد الكى جى وخلوه بدرى تلة ساعه وبرده اغلب الوقت يوصل اربعه وساعات يوصل اربعه ونص انا كام مره اروح اتنين ونص وملأيش ولا بص واقف ادام المدرسه واول ماطلع على ترعة المريوطيه يبتدو يهلوا وطبعا بتبقى تلاته قله انا والله من الكتر المشاكل الى قابلتنى معاهم بنسى

 

انا مش عايزه اقولك ان البنت الى فرجتنى علىالمدرسه الى قاعده فى الرسبشن بقلها انى كنت بشتغل فى تجريبى قلتلى انا فكر ان ادخل ابنى تجريبى متميز اصلى سمعت انه كويس وقاعدت تكلم عن التجريبى فالستغربت وفضل كلامها يرن فى ودنى مع كل مشكله تحصل لغايه موضوع الفرشه ومستحملتش مشيت وانا حسيت ان الحضانات الى فى الفيلل احسن منهم وخصوصا فى الانشطه وانا تعبت مع ابنى وكنت متبعاه جامد فى العربى هما فى العربى مش كويسين بيده كده وخلاص بس اشتكيت وبداوا يزودوا وقت العربى

ولالنجليزى المدرسه الاجنبيه صراحه كانت كويسه ديه جات فى النص التانى وهما حرام فيهم الفلوس

 

سمسمة المسمسمة   05-2009

لمصاريف 8000 بس عاملين اوفر لاخر الشهر دة تخفيض 10%يعنى بقت 7300

اللبس 700

الكتب 700 شاملة الادوات

الباص من 2000 الى 2300 حسب المكان

فية صالة رياضية وملعب كرة قدم كبير ومنطقة مخصصة للكى جى فيها العاب ومراجيح وعربيات ومزروعة نجيلة

حجرة معينة للغة العربية وتعليم الحروف العربية

معمل كمبيوتر ورسم

طابور للكجى هيكون بعد ما يفطروا لوحدهم بعد طابور الكبار ما يخلص

معاهم مشرفات اثناء الفطار

الادوات والكتب هيفضلوا فى المدرسة والولد يرجع بالهوم ورك بس

الانشطة داخل المصاريف

بس لو حد يحب نشاط اضافى زى السباحة دة هيكون يوم السبت باشتراك لوحدة

معندهمش حمام سباحة بس بيودوا الولاد فى نادى برة

مواعيد الدراسة من 8 الى 2ونص

عدد الطلاب الكجى 11 الى 15

والمراحل الاكبر من 15 الى 20

الباص مكيف

الباص عبارة عن الميكروباص التيوتا جديد وشكلة حلو وفية 14 راكب والاطفال راكبين كويس وطبعا فية مشرفة

اللبس من المدرسة

فى الفصول فى مشرفة ومدرسة ودادة

الحمام 2مشرفة ودة لمراحل الكى جى

الحمامات والاحواض نظيفة وصغيرة وفيها مرايا صغيرة

فية تجويد وقران بجانب منهج الوزارة واحاديث

مدرسات مصريات بس متخصصات

اللغة التانية بعد الكى جى المانى او فرنساوى

امكان لوضع الكتب وادوات الطلاب فى كل فصل

الارض سيراميك ونظيفة

كل طفل دسك لوحدة

التعامل والمقابلة والتعاون كان كويس جدا ولطاف

وطبعا فى مسجد

 

فرست وان   05-2009

انا ولادى الاثنين فى بلووم من اول ما فتحت من سنتين هما دلوقتى رايحيين kG2 و Prim.2 – انا اللى شجعنى ادخلهم هناك انها قريبة جدا من بيتى ولما دخلتها كانت لسه اول سنة عجبنى اوى شكل المدرسة والمبانى والمساحات الخضراء حسيت ان فيها ذوق راقى كده واللى شجعنى اكتر لما قابلت مدير المدرسة والمدرسين بصراحة لقيتهم ناس محترمين جدا ، الحمد لله بعد سنتين فى بلووم انا مبسوطة جدا من مستوى ولادى الاثنين و لأنى كنت فى اول دفعة تدخل المدرسة اخذت خصم 20 % على المصاريف والحمد لله المصاريف مازادتش خالص فى السنة الثانية والخصم اللى خدته اول سنة حايفضل معايا على طول

انا ممكن اشرحلكوا بالظبط نظام المناهج ايه – هى المدرسة Semi international وده مش معناه انها بتدرس منهج امريكى ولا بريطانى ده معناه – انهم بياخدوا من المناهج الــInternational حاجات تخدم المناهج الناشيونال يعنى طرق وافكار فى بعض المواد – زى الــ English بيدرسوا Macmillen فى A- Level ومعاه كتاب امريكانى اسمه Moving Into English ده بيركز على تحسين الــ Oral English ، كمان فى مادة اسمها Mental Math ( غير الــ UcMas ) دى مناهج British المدرسة دخلتها من اول سنة بتساعد الولاد يفكروا فى اكثر من طريقة لحل المسائل ، البوكلت بتاعها ظريف اوى ابنى اللى رايح Prim.2 كان بيحب يحله بس المشكلة انها حصة واحدة فى الاسبوع والــ International English كان حصة واحدة السنة الاولى بس زودوه حصتين بعد كده ، فى منهج كمان كندى فى الكمبيوتر اسمه Techno kids الولاد بيدرسوه من الــ KG وده داخل اليوم الدراسى عجبنى فيه اوى انه كله عملى والولاد يتعلموا الــ Office من KG2 وبيعملوا Projects – اما فى الــ KG بيدرسوا كتاب I Can وده كتاب كله بيركز على الـOral والحروف بتدرس بطريقة الــPhonics والطريقة دى انا نفسى ما كنتش متخيلة قد ايه هى كويسة الا لما لقيت ابنى اللى لسه مخلص kG1 بيقرا كلمات من 3 حروف و 4 حروف لوحده من غير ما يكون خدها فى الكراسة – برده الaccent بتاعة المدرسات فى الـKG ممتازة مع انهم مش اجانب بس كلهم خبرة وطالعين اصلا من مدارس لغات أو International الحاجة الوحيدة اللى كانت مضايقانى فى المدرسة اول سنة ان حسيت الاهتمام بالدين مش زى مانا عايزة لدرجة انى فكرت احولهم لمدرسة ازهرى لغات بس الحمد لله لما اشتكينا لادارة المدرسة الناس استجابوا وزودوا حصص تحفيظ القرآن وعملوا منهج زيادة فى التربية الاسلامية بيركز على تقويم السلوك عند الاطفال وخصصوا وقت لصلاة الظهر فى الفسحة ، اما فى الــ KG فكل يوم فى تحفيظ قرآن ربع ساعة الصبح.

على فكرة يا جماعة ما فيش فرق كبير بين الــ American English و الــ British English غير فى الـ accent وطريقة كتابة بعض الكلمات والــ American English هو المنتشر اكثر بين الناس .

 

انا ولادى فى المدرسة من اول مافتحت ؛ كان ابنى الصغير فى Pre- KG عمر ماحصل معايا مشكلة زى اللى حصلت مع الاخت ام بيسو. بل بالعكس كنت بأحس ان المدرسة والمشرفة اللى معاه فى Class واخدين بالهم كويس من كل حاجة ولان ابنى متعب جدا فى اكله كنت دائما اوصيهم عليه علشان يصبروا معاه ويتأكدوا انه خلص أكله كله يوم بيوم. بصراحه كانوا لطفاء جدا وصبورين معاه وعلشان كده هو بيحب الميس قوى.

اما حكايه الضرب دى ماحصلتش ابدا بالعكس ولادى بيحبوا المدرسة والمسات بتوعهم.

 

kokycat4   أبريل 2010

انا بنتى فى بلووم كى جى وان وانا هحول من المدرسة لاكتر من سبب
1-منهج بلووم الى هم بيقولوا انة سيمىانترناشونال علشان كدا المدرسة غالية فى مدرسة سما ومدرسة المقطم بيدوا نفس المنهج ومصرفهم 6000 مع العلم ان المدارس دى بتسلم الكتب مع سى دى وأحنا مخدناش حاجة ولما اشتكينا قالوا المورد مجبهاش
2-بالنسبة للانجلش الترم الاول كان فى مدرسة كويسة جدا وكان الولاد عندهم حصيلة كويسة الترم التانى مشيت الميس و الولاد فضلوا شوية كدا يوزعوهم على الكلاسات وشوية مديرة الكى جى هى الى بتديهم وفى الاخر ميس الكمبيوتر هى الى بتديهم انجلش ولما اشتكينا قالوا هى اصلا مدرسة انجلش بس علشان عبقرية فى الكمبيوتر بتدى انجلش وعلى فكرة لما حبيت اعرف هى خريجة اية مرضيوش يقولوا وقالوا مش مهم المدرس خريج اية المهم الاكسنت بالرغم ان الولاد بينطقوا وحش جدا ومعظم الكلام بيقلوة غلط
3-العربى صراحة المدرسة ممتازة وشغلها كتير وحلو وعندها افكار كتير وبتشغل العيال كويس جدا بس هى صغيرة جدا بس يصراحة شاطرة
4 الماث مشكلتة فى طريقة التعليم نفسها يعنى الولاد بيقولوا فايف تين وسكس تين او فايف وجنبها وان ودا غلط لانهم مش بينطقوها على بعضها 
5-الاكتيفتى تقريبا مفيش يعنى احنا تقريبا مش بناخد بى اية خالص ولما اشتكينا قالوا علشان تدريبات الحفلة والرسم هما بيقولوا انهم بيدهوم بس انا طلب اشوف حاجة بنتى ولا حد سأل في واول السنة بعتوا رسمة وحدة بس وبعد كدا ولا حس ولا خبر
6-كان مفروض ان فى مساعدة للميس داخل الكلاس كان فى الترم الاول الترم الاول مشيت وبقت مشرفة الباص هى المساعدة وطبعاهى اصلا ملهاش فى قصة الانجلش دا خالص
7- دفعنا 1000 جنية اكتيفتى ولا استفدنا منهم بجنية ودفعنا كمان فى الحفلة للفرد 50 جنية
8-دفعنا فى الباص 2300 جنية تقريبا وكان فى الترم الاول سىء جدا يعنى بنتى نزلت من الباص ورا المشرفة فى شارع تانى ولانش بوكس وقع فى الشارع و المشرفة تايهةودخلوا مرة البنزينة يمونوا بالاطفال وحاجات كدا كتير بس الترم التانى الوضع مستقر ماعدا موضوع التكيف الى مرة يشتغل ومرتين لا
9-صاحبة بنتى امبارح طول اليوم تعبانة والبنت مروحة البنت حرارتها 40 ومكلفوش نفسهم يتصلوا بالاهل يجوا يخدوها لدرجة ان سواق الباص وباباها بيخدها قالوا البنت مش قادرة تفتح عنيها وعمالة تدمع وبترتعش برغم ان البنت قالت اكتر من مرة انا تعبانةوفى ولد كمان مامتة بعتتليهم بلاش تطعموة علشان هو اطعم طبعا طعموة
10-لما اشتكينا ورحنا لاصاحب المدرسة كانت النتيجة ان ميس الانجلش وزعت بريزنت على الكلاس كلة ماعادا ولدنا بس وبعتت ورقى البيت بلاسماء كل الكلاس 3 اطفال هما الى مش بيغلطوا خالص 8 دول عندهم عادات سيئة بيحولوا يغيروها ومكتبش اسماء اولاد 3 التنين خالص يعنى ولا هم كويسين ولا هما بيحولوا ولما رحنالها قالت الولاد عندهم عادات سيئة فى اللى بيسرق وفى الى بيرضع صباعةوطبعا أحنا مكناش عارفين ان فى ولد عندة مشكلة السرقة دى وانها بعتت لاهلة ومكنش من المفروض انها تقول للناس كدا هى فعلا ماقلتش هو مين بس دا مفروض سر والمهم لما اهلة راحوا قالوا الولد ازاى بيسرق قالت كان فى حلويات على مكتبى خطف واحدة وجرى
11- الكوبى بوك بتاعة بنتى متعلمش من يوم 25/3 واشتكيت ان الهوم وورك مش بيتصحح بس لا حياة لمن تنادى
12- الدين من اول السنة مسمعناش عنة اى حاجة ولا بيخدوا اية ورحنا برضوا واشتكينا ان مفيش اهتام بالدين خالص وقالوا ازاى دا احنا عندنا مدرسا نت الازهر بس فين الله واعلم دا حتى الولاد مش عرفين اسمها
على فكرة انا عارفة ان لو رحتم المدرسة وسألتم عن كلامى دا هيقولوا مش مظبوط زى ما انا كنت شوفت كلام ام بيسو وسألتهم قالوا لا محصلش و الولد كان بيعمل تويلت على  نفسة واحنا علمناة والام كانت مديا المدرسة شهادة تقدير بس هما محتفظوش بيها انا بقى بقول يا جماعة الى عاوز يتأكد انا ممكن اديكم تليفونى ومش انا لوحدى احنا كتير قوى فى بلووم عندنا مشاكل 
وعلى فكرة كمان دا مش هجوم على المدرسة انا بقول تجربتى و المدارس دى وجهات نظر يعنى انا اسمع انهم فى بريمرى كويسين لان مديرة البرايمرى ممتازة و الله وأعلم الى عاوز اى استفسار الايميل بتاعى موجود

kokycat4   مايو 2010

شهادة حق انا قبل كدا كنت كتبت على عيوب المدرسة والمشاكل الى فيها وكان اخر حل صاحب المدرسة وفعلا قبلتة وبسهولة جدا والرجل كان متعاون جدا جدا جدا وخلال فترة قصيرة حل بعض المشاكل ووعد بحل باقى المشاكل السنة الجايةولدرجة ان فى مشكلة حصلت فى الباص هو بنفسة خد الولاد فى عربية الخاصة ووصلهم لاهليهم اعتقد دا مجهود للتحسين من مستوى المدرسة يستحق الشكر علية وكم اتمنى ان يستمر هذا النشاط و الرغبة فى التقدم بمستوى المدرسة ولا يكون نشاط مؤقت بسبب قرب انتهاء العام الدراسى وفتح ابواب التحويل فى المدارس الاخرى
و الله واعلم




إدخل تعليقك ورأيك فى المدرسه