مدرسة نور للغات

 

مدرسة نور للغات

 

 العنوان: طريق القطامية، مخرج 9، خلف محطة بنزين وطنية

 التليفون: 0125298813 – 0108971113

http://www.noorschools.net/default_ar.aspx

 المصاريف:

         

        الباص:

        الزي:

أراء أولياء الأمور فى المدرسه :

 

مليكة القلب 25-10-2008 

انا لما بدات اذاكر لقيتها مش بتستوعب بشكل سريع الشرح لما يكون بالانجليزي

 

سادينا 5-11-2008

عندي قريبة ابنها في ك ج2 مش عاوزة اضايقك لكن اكتشفنا ان اصلا مدرسة الانكليزي سابت المدرسة من اول السنة وهم من غير مدرسة دلوقت ومدرسة اولى ابتدائي بتديهم اوقات لما يكون عندها وقت ولو في مدرسة بتقبله دلوقت كانت نقلته وبسرعة غير ان الحمامات حاجة مش معقولة ومن غير مية كل الوقت.يعني الموضوع قلب تجاري عندهم

 

رأى و لى أمر 19-11-2008

Salamo 3alaykom

i'm a new member here...my daughter is in KGin Noor school...she started with them last year Kg1...the school was not bad last year...this year it's a disaster...i don't know what to do with the administration..they listen to u but they do nothing..hope any one can help me plz....Thanx a lot

 

مليكة القلب 22-11-2008

انا سمعت عن موضوع الكلاس اللي من غير مدرسه فعلا و قابلت اولياء امور للطلبه في الكلاس ده طبعا مهزلة

بالنسبه لبنتي _ هي كانت مشكله الميس انها بتغيب كتير لكن الموضوع اتظبط في الفترة دة و كلنا بنرجح ان الموضوع كان له علاقه بمشاكل مع الادارة

بالنسبه للمنهج انا مش مقتنعه بيه و حاسه انه ناقص كتير سواء للعربي او الانجليزي او الماس

يعني هم لحد دلوقتي بياخدو ا الارقام و الاكبر و الاقل و كدة و مخدوش الجمع

الانجليزي مش لاقيه منهج ملموس يعني اخدوا الالوان كتابه و a , the , my

و مواضيع حاسه انها مش مرتبه

طبعا ناهيك عن المشاكل التانيه زي اليوم الدراسي و قصره و الترفيه و الانشطه للي ممكن تكون معدومه بالرغم ان المصاريف حوالي 7500

طبعا تكلمي الادراة بالرغم انها شكوي عامه يبينوا ان الدنيا وردي و ان المواضيع بتتظبط و كدة

 

مليكة القلب 31-12-2008

المدرسه بقي فيها تحسن كبير جدا عن الاول يعني هم في العربي ماشيين تمام جدا بعد ماخلصوا الحروف كلها بالحركات التلاته و بداوا في الكلمات

و في الانجليزي برضه بداه يخدوا جمل و يكتبوها و اخدوا مجموعه كبيرة من الكلمات و كمان بتملوا الكلمات

يعني تقريبا بقوا في نفس المنهج للمدارس التانيه الحمد لله

 

الحمد لله المستوي اتحسن كتير جدا جدا و دة انا حاساه فعلا من مستوي البنت و مقارنها باخرين في مدارس تانيه

يعني هي دلوقتي و لله الحمد بتحاول تقرا جمل عربي و و كمان في الانجليزي اخدوا كم كبير في الكلمات و الجمل و بداول يكتبوا كلمات و جمل و الطلبه كمان بتقراها كويس

و الماس برضه ماشاء الله ادوا الطلبه الجمع بكذا شكل و طريقه

الانشطه فيها تحسن واضح سواء للرحلات و الانشطه و السباحة بدات برضه

القران هو وصلوا الحمد لله لصورة البلد و كمان بالاضافه لمنهج نور التربوي و اللي ادوا الاطفال فيه قيمه صله الرحم و التعاون و الرحمه

انا حبيت ادخل زي ما اشتكيت قبل كدة من المدرسه اقولكم علي التحسن الواضح في المستوي

و بالتوفيق للجميع

المدرسه دلوقتي كويسه جدا في اللغه و العربي مهتمين بيه جدا و الدين كمان كل يوم حصه قران و مرتين في الاسبوع دين و قيم

و الانشطه كمان اتحسنت كتير عن الاول الحمد لله و فعلا مستوي الاولاد كويس جدا جدا

 

الحنون

ابني في مدرسة نور للغات وهي بجوار كارفور المعادي هو في KG1

وهو كان هناك من Baby Class .. المدرسة فوق الممتازة ..

 

اولا: من ناحية الإدارة .. إدارة متعاونة جدا و عندهم برنامج تربوي و اخلاقي واضح ويتم متابعته مع الأهل .. عند حدوث اي مشكلة فبالحديث مع الإدارة يتعاونوا تعاون كامل منتهى الذوق و الأدب الراقي صراحة ، أيضا فإنهم يقبلوا أي اقتراحات ويناقشوها بصدر رحب ويتم التنفيذ سريعا طالما في صالح المدرسة والأطفال ...

 

ثانياَ : اختيار المدرسين لديهم ممتاز .. مستوى عالي في اللغة و الaccent عندهم ممتاز لا يتم الحديث باللغه العربيه إلا في حصص اللغة العربية والقرآن ( بالمناسبة القرآن لديهم يوميا ) و برنامج الأخلاق ليهم بيطبقوه بالتكامل مع كل المواد عندهم نظام قيمة لكل شهر و تكون رحلة المدرسة متكاملة مع قيمة الشهر ويرسلوا استبيان للأهالي لمتابعة القيمة مع الاولاد لتشجيع الأولاد و غرس القيم.

 

ثالثاً: الإدارة والمدرسين يجتهدوا في أن يحب الطفل المدرسة وهناك الكثير من الألعاب بالاضافه ان المدرسات مختارات بعناية عندهم صبر واحتواء رائع للأطفال .. (ابني كان لما يزعل مني يقول لي انا كنت مبسوط في المدرسة يا ماما وانتي بتزعليني كده

المدرسة تطبق منهج الsemi-international

الفصول لطيفه جدا وألوانها حلوة بالنسبة للأطفال والفصل به 24 طفل

ايه تاني ؟؟

حفلات المدرسة جميله وهناك يمكن 3 مرات في التيرم حفلات .. الملخص ان المدرسة جميله جدا وانا حاسه انها بتكمل معايا ما افعله انا في البيت .. وبتساعدني كمان بصراحة .. عرفت ان كان في عندهم مشكلة في التيرم الماضي في KG 2 في مدرسة ال english بس انا عرفت ان المشكلة اتحلت .. حقيقي ال staff بتاع المدرسة ممتاز جدا ..

معرفش مصاريف المدرسة هتبقى كام للي هيقدموا جديد

بس السنة الماضية كانت 6000 غير الباص 2000 والكتب 600

أتمنى اني اكون افدتكم ..

 

جاسى 5/4/2009

 

والله أنا حاسه إن اللغة عندهم مش قوية أصل انا عايزة البنت تكون fluent هما فى البيبى كلاس بيخدوا على كل حرف 4 كلمات غير الأغانى بس مش حاسة إن بنتى مستوعبة مثلا لما اسالها بالانجليزى اسمك ايه مدرستك ايه فصلك ايه.

يمكن يكون استيعاب بنتى هو اللى محدود او الاكاديمى عندهم محدود .

أنا عندى واحدة صحبتى ابنها فى نارمر عارف كل حاجة فى الفصل اسمها ايه- فى غرفة المعيشة - فى الحمام - حافظ مثلا لو شاف حد بيصلى يقول he is praying -يعنى جمل بسيطة.

أما النظام والله اول السنة الباص ما كانش منتظم و اشتكيت و اتعدلوا بس بعد ما انفعلت ...و مثلا كنت متخيلة انهم حيعلموا الولاد اداب الطعام و يقولوا من فضلك و حاجات زى دى بس محصلش.

و فى الاكل : كانت أول اسابيع بتيجى ماحدش بيلمس الشنطة .بس بعد كده اتحسنوا.

النشاط حاساه مش كتير : عملوا حفلة الحج و ماكنتش منظمة أوى و طولوا فى المراسم و الولاد ماكانوش مستوعبين كل ده - مافيش فان دايز كتير مع انهم اطفال مش رايحين ياخدوا الدكتوراه.

بحس المدرسات كتير بيكبروا دماغهم عن الشكوى.

لو غابت يوم كان فيه حاجة المفروض ترفق بال channel book بينسوا يرفقوها تانى يوم.إلا إذا كانت رحلة مثلا حندفع فيها فلوس.

من ناحية تانية المدرسات لطيفة مش متعجرفين زى ما بسمع عن مدارس تانية - الفصول جديدة مش زى ما شوفت فالبشاير و امجاد- مساحة الحوش حلوة مش زى مدارس تانية كتير - الباصات جديدة و بحالتها-

بيطبقوا منهج ماكميلان وده حسب ما اسمع اقوى منهج.

الناس هناك معتدلة مش متدينة بزيادة و لا متحررة اوى.

البنت خدت مثلا صورة الناس و الفلق و الفاتحة . اه بتقولهم مكسرين شوية بس خلاص عارفاهم.

أنا عايزة بنتى تكون معتدلة مش تيجى تقولى زى ما بسمع فى مدارس تانية النقاب فرض و انا محجبة.

سعر البيبى كلاس السنة اللى فاتت كان حولى 5000 والباص 1800 و اللبس حوالى 600 و ده يعتبر معقول

بصى مش حتلاقى كل حاجة كاملة- أنا بعد ما لفيت حسيت إنها مش وحشة معقولة بالنسبة لمدارس كتير و قررت اطول بالى عليهم و أجرب السنة اللى جاية كمان و ربنا يسهل

 

أنا فيه حاجات بتعجبنى فيهم و حاجات أكتر مش بتعجبنى: بحس انهم مش بيهتموا بالنظافة و النظام اوى يعنى مرة رحت لبنتى لاقيت مناخيرها مش نظيفة و الكلاس المناديل اللى فيه خلصت و طبعا لان أكتر الاطفال عندهم برد كانوا مرشحين و شكلهم مش لطيف انا بعتبر ده تقصير ........اصلهم 24 طفل ف الكلاس و معاهم مدرسة و مساعدة يعنى مش كيميا انهم يراعوا الاطفال ...كمان هما طلبوا مناديل ف اول السنة وجبت عادى مش عارفه انا بتجنى عليهم كده ولا لا ....حد يقولى ومواعيدهم مش بتكون مضبوطة اوى ... ولازم تشتكى مرة واتنين علشان يستجيبوا وده لو استجابوا ولو غابت البنت بالايام مش بيسالوا ........وطبعا لو كان فيه حاجة حصلت خلال غيابها رحلة مثلا حيطلعوها و لا اى نشاط اعلنوا عنه ......مش بيتأكدوا ان المعلومة وصلت ولما تيجى تقولى مجاليش يقولوا اصل البنت كانت غايبة يومها و طبعا نسوا بعد كده يحطوا الورقة ف الشانيل بوك وبنتى ف بيبى كلاس محستش اوى انها استمتعت بأنشطة ... ومع ذلك ليا اصحاب ولادهم ف مراحل متقدمة كى جى2 و برايمارى بيشكروا فيها جدا و مبسوطين واضح ان متتطلباتهم ف المدرسة مختلفة عن اللى انا عايزاه

 

سادينا 2009

اعرف حد مدخل ولاده فيها وحينقلهم منها.تعليميا هي مجرد مدرسة بتحشي الاطفال وبس.بيعطوا واجبات مش طبيعية انا بتكلم عن اولى ابتدائي و تانية ابتدائي.ويا ريت الطالب بيجي فاهم حاجة من الواجبات يعني الاتكال كله على البيت.انا بكلمك عن طلاب اعرفهم وهم من الاوائل لكن بمجهود مامتهم.ثانيا في فوضى بنسبة كبيرة في حاجات كتيرة.والمدرسة تقريبا اكتر الاوقات المية مقطوعة فيها والحمامات مش نظيفة...ده اللي بسمعه دايما من حد قريب جدا لي ولاده فيها

 




إدخل تعليقك ورأيك فى المدرسه