مدرسة المصرية للغات

 

مدرسة المصرية  للغات

 

 العنوان:

 التليفون:

 المصاريف:

        للتمهيدي: 5800 مصاريف - الكجي : 8000 جنيه بالكتب - بري 4 : 9000 - 100 جم ابلكيشن 100 جم تحت حساب اللبس وبتخدى بيهم ايصال وعند الشراء بيتخصموا

 

        الباص: 1500 جم باص للتجمع ، 2300 جم لغير التجمع

        الزي: 500

 
 أراء أولياء الأمور فى المدرسه :

 

 

بنت مصر (مايو 2008)

 

مستواها ممتاززززززززززززززززز.....انا اعرف ناس كتير أولادهم فيها و كلهم مبسوطين من المستوى و اللغه.أنا ابنى فى غريانى فى التجمع و بافكر انقله المصرية لكن المشكلة انه هيضطر يعيد kg1 تانى لأن سنة صغير و المصرية بياخدوا 4 سنين فى kg1مش 3 و 1/2 زى مدرسته

 

كل اللى أعرفهم فى المصرية اجمعوا على انها ممتازة فى اللغة و التعليم و كمان أخلاق الطلبة فيها كويسة بالمقارنة للمدارس التانية.و كمان بيعملوا أنشطة حلوة للطلبة:ترفيهيه و ثقافية و رياضية

 

المدرسة لغات بس و كمان فيها international و مكانها أمام جهاز مدينة القاهرة الجديدة بالضبط,أمام مدرسة الشويفات و تليفونها 27592270 و ليها فرع تانى فى الحى السابع 24016970

 

بنت خالتى و أخويا و 3 صاحباتى أولادهم هناك و كلهم مبسوطين.....و الاجماع ده حاجه نادرة

المصرية كشكل مدرسة مش مغرية أوى بالمقارنة بباقى الحاجات, لكن لاحظى انها أقدمهم.....مبنى التجمع ده بقاله حوالى 14 سنة!!!!

صحيح مبانيها مش أد كده لأنها قديمه بقالها حوالى 15 سنة,لكن تعليميا و تربويا تحفة تحفة.....اللغه عندهم ممتازة و التدريس و متابعة الطلبة تربويا و تعليميا و كمان بيهتموا بالرياضة و الأنشطة كويس أوى..... يعنى اللى عاوز مدرسة بجد.....تغليم و أخلاق و لغه....يتوكل على الله

 

أيمو  (مايو 2005)

 

المصريه للغات بصراحه كل الناس بيشكروا فيها اوى تعليميا هى المدرسه تحسيها قديمه بس هما هايلين .

 

Om Ziad  (يونيو 2008)

المصرية للغات انا برده قدمت فيها والمدرسة بصراحة ممتااازة وفى مدرسة بتشتغل هناك بتشكر فيها جدآآ
لكن انا بصراحة ماعجبنيش المانى ولا اماكن اللعب ..انا حابة تكون المدرسة مكان مبهج لاطفالى عشان يحبوها ويستمتعو فيها
وعلى حد معلوماتى -بقالى سنة كاملة بلف واسأل على المدارس-
ان افضل المدارس فى التجمع هى مصر الحديثة والمصرية للغات وطبعآ منارة الفاروق دول سمعتهم ممتازة

 

أم مريم 2008  (يونيو 2008)

كل الي اعرفة ان المصرية ( مع انها مدرسة قديمة و مبانيها قديمة ...بس هي تعتبر من احسن المدارس في التجمع الخامس ....) لي اقارب كثير فيها و بيقولوا انها مدرسة كويسة و مستمرين فيها
مصر 2000 ( مستواها نصف نصف ) المصرية تعتبر احسن منها.

ليا اقارب بسمع منهم عن المدارس . معظمهم اتفق على المصرية (بس عيبهم الوحيد انها قديمة مش روشة زي المدارس الجديدة )

 

Sadina  (يونيو 2008)

مرة شفت واحدة قدام المدرسة ولادها فيها وكانت متضايقة قوي وسألتها اي رأيك في المدرسة قالتلي اهي زي اي مدرسة بيتكلوا على البيت دي مدرسة ولا حلوة ولا حاجة

--

انا اليوم رحت المصرية للغات.عجبتني اوي عجبتني نظافتها مقبولة.والناس اللي فيها حلوين ونطقهم بالانكليزي حلو ومستوى المدرسة عجبني.هي عجبتني اكتر من غيرها بكتير

عمانا مقابلة وبصراحة المدرسة هايلة وال miss اللي عملت معي مقابلة لغتها ممتاااااازة وكمان ال miss اللي حتكون مع بنتي رائعة her accent is very very great.im sooooo happyوتقريبا كانوا بيسألوا كل حاجة بالانكليزي فالحمد لله انا وباباها تكلمنا كويس اوي طبعا

هي مدرسة هايلة بأمانة انا دخلت بنتي ناشيونال ولو حبيت انقلها انترناشيونال ممكن في اي وقت.لكن انا شايفة المدرسة حلوة اوي فأكيد الناشيونال حيكون ممتاز كمان.

فيها قسم للبنات وكمان اول حاجة سألتهم عنها هي الدين واللغة العربية  فعرفت انهم بيهتموا باللغة العربية    والدين جدا وهم بصراحة ممتازين بال  ENGLISH

مبنى البنات في المصرية منفصل تماما عن المشترك.يعني كل واحد في ناحية والمصاريف للبيبي كلاس 5000 و2200 باص

وده موقعهم لو عاوزة استفسار عن المدرسة http://www.elsegypt.com/

وكمان العنوان هو التجمع الخامس, تدخلي عند مدخل القطامية هايتس وتفضلي ماشية عند جهاز المدينة اول ما تكوني قدام جهاز المدينة هي حتكون بعده على اليمين,يعني حتشوفيها على طول وتلفونها 27592270/1/2/3/4

 

بنت مصر  (يونيو 2008)

تانى أؤكد ان المصرية كله بيشكر فيها.....و على فكرة يا جماعة....أنا الحمد لله اتقبلت فيها مدرسة science و ده هيخلينى أتابع مستوى المدرسة أكتر ، رغم ان المصرية شكلها مش حلو أوى,لكن فيها اهتمام بالأنشطة و الرياضة.

انا متحمسة ليها لأنى عارفة ناس كتير فيها و مبسوطين لأن المدرسة بتدى التعليم حقه.

 

بنت مصر  (أكتوبر 2008)

 

الادارة حازمة جداً,منهج الانجليزي ممتاز...اللغة عند الطلبة كويسة أوى,بيهتموا بالأنشطة المختلفه,منظمين و فى مدرسة البنات محسوكين....لا مجال للخطأ!!! بيحاولوا يطوروا أساليب التدريس.....

المبانى كشكل مش جميلة أوى....العدد فى الفصول فى حدود 25(غريانى 20 بس)و ساعات أكتر....

 

sadina  (نوفمبر 2008)

 

بتديت الاحظ تقدم واضح.يعني بنتي بقت حافظة حاجات كتيرة هي بتحب المدرسة جدا وبصراحة المدرسة منظمة وحلوة وبيهتموا بأي ملاحظة بقولها

 

Kouky5 

 

فيه مدرسة المصرية للغات فرع مدينة نصر هي جميلة جدااا ....لغاية ابتدائي اما اعدادي وثانوي في التجمع الخامس ..المصاريف 7000 بدون باص

في المصرية المقابلة تتم باللغة الانجليزية للاهل والطفل ... لكن لو الطفل كان خايف وارتبك اعتقد مفيش مشكلة ده لسه اول مرة يدخل مدرسة وطبيعي انه يتلخبط عادي ما تقلقيش

الاسئلة كانت في اسماء الحيوانات والالوان والفاكهة .... بعض الصور وعليها اسئلة ....تركيبات زي الشكل والظل بتاعه وحاجات كلها بالشكل ده

بيبي كلاس في المصرية 5500 في السنة بدون باص تدفع علي مرتين

 

كرانكى

 

صباح الخير انا حابة أقول تجربتي مع المدرسة المصرية أنا رحت المدرسة المصرية فرع التجمع و عجبتني بس قلت حرام المشوار دا على ابني فقلت أقدمله في فرع مدينة نصر لحد ما يكبر و يستحمل المشوار انقله في اعدادي التجمع و بدأت الدراسة و فوجئت ان باص المدرسة في لفته ابني اول واحد الصبح و بيروح البيت آخر واحد و باص التجمع بيعدي تحت البيت عندنا بعد باص مدينة نصر الصبح و بيروح قبله العصر تخيلي !! مع العلم ان بالعربية حسبنا المسافة للمدرسة 8 دقايق بس و طبعا التجمع ابعد كتيييير بس و سألت ولد في شارعنا في التجمع قالي ان احنا عشان جنب صلاح سالم بيعدي عليه آخر واحد و بينزله اول واحد و ندمت اني مدخلتهوش فيها كانت تبقى ميزة ليه بس طبعا ليكي انتي في متابعة الطفل في المدرسة مشوار و ايام الأمتحانات انا بحب اوصل ابني لأن الباص بيعدي بدري زيادة مثلا 7 الا تلت و الأمتحان 9 فأنا بوصله 8 و لو كان بعيد مكنتش حوصله طبعا
كل الكلام دا يتوقف على انتي ساكنة فين اسألي سواقين الباص في المدرسة اللي حتختاريها غالبا بيكونو عارفين يعني دورة ابني في الباص متغيرتش غير 5 دقايق من السنة اللي فاتت
 

 

كرانكى

 

أنا ابني في المدرسة المصرية في grade 3 فرع مدينة نصر مميزات المدرسة
الإلتزام - المنهج ممتاز - تحسي و انتي داخلة المدرسة و الناس اللي بتتعاملي معاها انهم عيلتك ناس لطاف و ذوق -المدرسة منظمة - في اهتمام بالمناسبات الدينية - الأنشطة في عندهم حصة art و في ميديا و في موسيقى و في نشاط اضافي كل خميس الأهل بيختاروه بس انا مش بحسب الأنشطة من المميزات لأن اي مدرسة عايزة تاخد حصص النشاط كلها بتاخدها عادي و يمكن اغلب الحصص بتتاخد خصوصا آخر السنة كمان نشاط يوم الخميس ابني مشترك فيه من سنتين و متعلمش حاجه مفيده و انا بسيبه عشان هو بيلعب مع اصحابو كأني وديته النادي مثلا
بإختصار الأمهات اللي بتحب المذاكرة و الالتزام و التأسيس حتتبسط اوي بس انا مش مبسوطة اوي و مسمية المدرسة جيش بحس انها صعبة امتحانات كتيير دا في شهرمن الشهوركان آخر يوم في امتحانات الشهر كان اول يوم في الكويزز انا ساعات بشفق على ابني من كل دا - بس ناس كتير بتحب كده و بتعتبر ان دا التأسيس -يمكن عشان بقارنها بمدرستة القديمة مانور هاوس في زايد كانت الطف و انشطة اكتر و ملاعب كبيرة و اللغة عندهم اقوى بس سلوكيات بعض الولاد كانت غير منضبطه بعكس الأولاد في المصرية كلهم ولاد ناس طيبين محترمين طبعا مفيش مدرسة كاملة بس انا بقول المدرسة المصرية ماسكة العصاية من النص تعليم ممتاز و أنشطة معقولة بس و لو حد عندو استفسار انا في الخدمة
على فكرة كل تجربتي مع فرع مدينة نصر يعني في أخت هنا حكيت عن عيد الطفولة في الجزء السابق اعتقد انها كانت كوكي 5 او بنت مصر انها حفلة تنكرية و حاجات لطيفة كتير محصلتش معانا - يمكن عشان سنة ثالثة كبار معرفش- بس احنا رحنا بزي مخالف بس بالكتب و الحصص بتاعتنا عااادي و الأولاد معاهم شيكولاته و اكلوها مع بعض و خلاص

 

كرانكى

 

انا حبيت اصحح معلومة قلتها عن النشاط في المصرية عن ان الأولاد مش بيتعلموا حاجة جديدة هو شكلو ابني انا اللي مش بيتعلم و آخدها لعب و بيسيبهم و يروح العاب كي جي فإسألي تاني او جربي بنفسك و ان شاء الله بالتوفيق

 

بنت مصر  (أبريل 2009)

 

الانترفيو بيكون فعلا عن حيوانات أو فواكه أو أشكال......
حاجات بسيطة يعنى بالنسبة للأهل,بيكون انترفيو بالانجليزى,بس بسيط يعنى....بيسألوا الطفل بيحب يلعب ايه؟؟؟ بتشجعيه ازاى؟ و بتعاقبيه ازاى و على ايه؟؟؟ و ايه أسلوب التعامل بين الأهل و بينه؟؟؟ كده يعنى

 

بالنسبه لموضوع الدروس ده استسهال أمهات,أو أم مواعيدها مش سامحة تقعد مع أولادها...

فى المصرية فعلا فيه طلبة فى ابتدائى بياخدوا دروس,لكن مششششششششش مع مدرسين المدرسة لأن الادارة بتعمل كنترول جامد على الموضوع ده و المديرة بنفسها بتتابع الحكاية دى. فلو انتى عندك الوقت و طولة البال,طبعا مافيش داعى للدروس و وجع الدماغ.و الله الواحد بيستعجب...........انا أخدت دروس فى ثانوية عامة,عشان ثانوية عامة....انما ابتدائى ايه اللى ياخدوا فيه دروس ده؟؟؟!!!؟؟؟؟ و بعدين ما شاء الله...المصرية مش بيقبلوا حد الا اذا كان كويس جدا فى مادته و بالتالى مدرسين المرسة بيعملوا اللى عليهم و زيادة,الباقى بقى على البيت و التلميذ.

 

و بالنسبة للباص,مافيش تكييف للأسف, وده فى كل المدارس الناشيونال.

بالنسبة لنزول البيسين,اختيارى.....لو مش عايزة,بتقولى لأ. لكن بيبقى معاهم اشراف كفاية و أصلا بينزلوهم بيسين أفال على أدهم خالص

 

 

sadina (نوفمبر 2008)

 

انا بنتي كمان حتبقى kg1 اللغة عندها ممتازة مع انها دخلت بتعرف فرنساوي وعربي بس لكن الحمد لله دلوقت الenglish عندها ممتاز وبعدين المدرسة متبعة كل الطرق الحديثة في التدريس وهم بيهتموا بالاطفال بطريقة تخليني متطمنة جدا عليها .المدرسات محترمات جدا واللهجة عندهم ممتازة وبيحترموا الطالب والاهل.لدرجة ان مرة رفضت بنتي تاخد معاها sandwitsh لقيتهم باعتين ملاحظة كبييييييرة ان ازاي تروح من غير اكل مع اني كنت باعتة معاها كتيرsnakes حسيت ان حتى صحة الطفل تهمهم وحاجات كتيرة اوي تانية خلتني ابقى مبسوطة اوي من المدرسة.

 

الانترفيو انا معايا شخصيا كان كله english لكن بنتي كان نطقها مش كويس لكن هم قعدوا معاها وقعدوا يشوفوا تعاملها ازاي واكيد كلامها كانت بتتجاوب معاهم لكن كلامها ما كان مفهوم عشان كانت نتتكلم لبناني على مصري على فرنساوي لكن انا حسيت من الانترفيو انهم عاوزين يشوفوني انا وبباها اكتر منها هي.على فكرة بنتي اجتماعية جدا ويمكن ده اللي حببهم فيها ونسوا موضوع كلامها والحمد لله دلوقت بتتكلم مصري واكيد english كويس جدا.لكن عاوزة اقولكم حاجة.مش لازم تستعجلوا التقدم مش حيبان قبل على الاقل 3 شهور من المدرسة.في ناس بتقعد تقول ان المدارس الانترناشيونال الدولية التدريس فيها كويس والمدرسين احسن عشان هم اجانب والكلام ده.انا عاوزة الفت نظركم على حاجة.المدارس دي حتلاقوا فيها اكتر من نص الطلاب مش مصريين والمحادثة بينهم وبين بعض اهم بكتير قوي من المدرسين والمحادثة في البيت كمان.يعني مش كل حاجة نبقى عاوزينها من المدرسة لازم المحيط كله يساعد.انا بنتي دلوقت مش بتقول بس كلمات هي ابتدت تقول جمل وكتيرة كمان وانا مش عاوزة اكتر من كدة دلوقت.انا اللي يهمني في المدرسة الى جانب التعليم,الاحترام والتربية والاخلاق.وكل اللي بقابلهم من اولياء الامور بيشكروا جدا من الناحية دي.

 

Dr om yara  (أبريل 2009)

 

الأنترفيو معى انا وباباهم كان سهل كان بالانجليزى بس كان اسئلة عادية مثلا عرفتى المدرسة منين & طريقة عقاب ومكافئة الاولاد & اوصفى الاولاد تكلمى عنهم&لمادا اخترتوا المدرسة واية تطلبوا من المدرسة. على فكرة احنا ناويين نروح نسال الاولاد منجحوش لية؟ مع ان الاولاد امتحنوا فى جرين هايتس انجليزىوعربى وحساب ونجحوا وعلى فكرة اولادى بياخدوا منهج برايت ستار هما فى مدرستهم الاوائل والترم الماضى حصلوا على الدرجات النهائية فى كل المواد وكانوا الاوائل على المدرسة

 

نوجا 76  (مايو 2009)

 

ممتازة تعليميا و ترفيهيا و بألها 15 سنة و كبيرة اوى فيها فيها international, national & girls school عيبها الوحيد انهم فى الدين مكتفيين بمنهج الوزارة

انا سألت فى موضوع المصاريف ده كتير طلع ان كل سنه دراسية بتزيد على لما بدأت كاجى بدليل ان مدرسة نور مثلا من سنتين كان كاجى ب3500 و دلوقتى كاجى ب7500 الى بدأ ب3500 مكمل على الاساس ده يعنى زيادته على ال3500 و الى بدأ ب 7500 مكمل على ال7500 كأساس


هما فهمونى كده فى الحسابات فى المصرية لأن مكنتش فاهمه لما جت واحدة قدامى و دفعت 7300 لبرايمرى و لما سألت قالت انها كانت دافعة فى كاجى حوالى 7000

 

أم عمر  (يونيو 2009)

 

أنا كنت باشتغل فيها هما بيهتموا اوي بالحفلات و الحفلات و الحفلات و بعدين الدراسة يعني ممكن الولاد ماياخدوش حاجة علشان التدريبات و بعدين ده حفلة في الترم الاول و اعياد ميلاد كل شهر و بعدين حفلتين في الترم التاني و تدريبات بالهبل ناهيكي عن عدم وجود اي حصص للدين خالص و عايزة اقول حاجة ان حكاية مدرسة كويسة او وحشة ديه نسبية تختلف من شخص للتاني يعني انا كنت دايما بافكر ان عمر لازم يدخل مدرسة اسلامية عشان يكبر و حافظ الاذكار و يحفظ قرآن كتير عارفة الحاجات اللي كتير منا ماحدش قالوا عليها و هو صغير و على فكرة انا كنت في مدرسة راهبات من كي جي وان لحد ثانوية عامة و بعدين دخلت جامعة الازهر كلية اللغات و الترجمة الفورية يعني تقدري تقولي شوفت كل التيارات: الراهبات و الازهر و المصرية و منارة الفاروق و صدقيني الخبرة علمتني ان اللي ولادنا بيتربوا عليه في الصغر بيفضل محفور في عقلهم لحد ما يكبروا انا لما دخلت الجامعة خدت وقت كبير عشان اعرف اقرا قرآن لاني العربي عندنا كان ضايع زائد ان طبعا حصة الدين بتتقلب

الكلام ده و الله بقوله عن تجربة شخصية و لكن لا الزم به اي حد لكن حسيت اني لازم اقوله للامانة مش اكتر و اسفة لو كنت طولت عليكوا

و شكراً

Kouky5  (يونيو 2009)

 

السلام عليكم ام عمر

ومع احترامي الكبير لرايك بس انا ماشفتش ده حصل معايا ولا مع صاحبتي وبنتها في كي جي 1

مفيش حفلات بالشكل الرهيب اللي بتقولي عليه ...حفلات اعياد الميلاد مش كل شهر ولا حاجة هما بيجمعوا كل الاطفال اللي عيد ميلادهم في الترم الاول وبيعموا حفلة واحدة لهم وفي الترم التاني لباقي الاطفال واحدة وبس كدة

وفي حفلة بتكون يوم في السنة بتبقي حفلة تنكرية والاطفال بيلبسوا فيها ازياء خاصة بمحافظات مصر وبس

مفيش حفلات تانية ولا اي حاجة ...بيكون في يوم رياضي وده بيتعمل في اغلب المدارس

أم عمر  (يونيو 2009)

 

بصي يا كوكي صدقيني ده مش رأي ده اللي كنت باشوفه هناك لما كنت بشتغل مدرسة في الكي جي في المصرية اللي في التجمع و قلت برضة ان الكلام ده كان موجود من عشر سنين و صدقيني انا ماعرفش في اللحظة ديه حالهم بقي ايه لكن انا كنت باحكي عن تجربتي داخل المدرسة و انا كان كلامي عن الناس اللي بتدور على مدرسة اسلامية و قلت انه ماينفعش ان المصرية نعتبرها مدرسة اسلامية و برضة كمان موضوع مدرسة حلوة او وحشة ديه حاجة نسبية ممكن انا اشوف المدرسة و يبقي لي اعتبارات معينة او معايير بدور عليها ملاقيهاش في مدرسة و الاقيها في مدرسة تانية و ممكن اللي يعجبني و مايعجبش غيري بس و اسفة على الاطالة

شكراً

أناناسه  (يوليو 2009)

 

صباح الخير يا كوكي والله انا سمعت كلام كتير علي المصرية دي . جارتي ابنها فيها ومش مستريحة منهم وعاوزة تنقله الفاروق .

وواحدة صحبتي من النادي كانت بتشتغل مدرسة فيها (فرع مدينة نصر) وبتقول انها كانت ممتازة بس بعد ما فتح الانترناشونال نقلو كل المدرسين الكويسين في التجمع والمستوي هنا انحدر .

والله يا كوكي انا كنت نفسي ادخله فيها لانها لازقة في بيتي بس رفضت لسببين:

الاول لانها ابتدائي بس و بعدين لازم يروح التجمع وانا مش عاوزة ابعدهم اوى

الثاني بسبب اللي سمعته عن الفرق في المستوي بين الفرعين

وحسيت ان كله محصل بعضه فاستخرت الله والحمد لله استقريت علي الرواد .

 

من أقوال المتقدمين للمدرسه:

 

(1) انا بنتي كانت بيبي كلاس لكن كانوا بيدوهم نشاطات كتيرة جدا وبيدوها واجبات من بعد الترم الاول واجبات بسيطة لكن كنت بحسها جاية فاهمة حتعمل ايه.

وهم التعامل معاهم جميل جدا. وبيهتموا بأدق التفاصيل ومنظمين جدا وبنتي ما شاء الله بتتكلم انكليزي كويس. يعني بتعرف تعبر كويس.

ولما رحت الاوبن داي حسيت ان الكل فاهمين وشاطرين.بعد كدة مش عارفة النظام لكن كل اللي شفتهم من الاهل شكروا لي جدا منها.

(2) المؤهل مش متاكدة منه بس ممكن اسال واقولك .....

الكلاسات للكى جى حلوة بس ابتدائى مقبولة...كتب الأنجليزى ليها 2 شريط كاسيت بس التيتشر انت وحظك فى منهم كويس اوى وفى لا .

نشوى

 

يا جماعه مدينة نصر واللى قدم فى المصريه واللى عاوز بس خايف من موضوع الدين المصريه مختلفش عليها اتنين وده من الحاجات النادره جدااااااااااااا

انا كمان لما رحت الانتر فيو كانت البنت هايله وسألتنى تحبى الانترفيو انجليش ولا عربى ومش هيأثر على النتيجه بعدها انا قلتلها بصراحه انتوا مدرسه هايله بس يعاب عليكم قلة الاهتمام بالدين وقلتلها انى جبت الكلام ده من النت قالتلى ان الدين قليل فعلا فى KG بس بعد كده حصص والاولاد بيحفظوا ادعيه واحاديث واذكار بس الـKG بيكون قليل علشان ميبقاش ضغط عليهم وقالت انها هتبلغ الاداره بالرأى ده ويحاولوا يعملوا حاجات اضافيه للدين معلش يا جماعه رغيت كتير بس كنت لازم اوضح.

 

بنت مصر

 

بالنسبة للدراسة,فى ابتدائى بيبقى منهج الوزارة مع بعض الاضافات........ ماكميلان فى النجليش، بياخدوا ساينس من أولى، اللغة التانية من تالتة، غالباً الأولاد بياخدوا revision sheet على كل درس و بيتصلح طبعاً لو فيه طفل عنده مشكلة,سواء أكاديمية أو سلوكية, الادارة ببتابع مع البيت, و بيستدعوا ولى الأمر و يتابعوا معاه فى حالة الشكوى...طبعاً الموضوع بياخد حقه و لو الولد ليه حق,بياخده

 

مميزات المدرسة:

 

فرع التجمع واسع جدااااااااااااااااااا......عبارة عن 5 مدارس فى بعض...الكى جى,الابتدائى المشترك,الاعدادى و الثانوى المشترك,مدرسة البنات و الانترناشيونال.....كل واحدة من دول مبنى لوحده بplayground لوحده........

 

*فيه اهتمام كبير جدا بالأنشطة و الحفلات و المسابقات و كده.....

 

أكاديمياً....المدرسين أغلبهم على مستوى عالى جداً(استحالة تلاقى مدرسة كل اللى فيها متميزين) لكن على الأقل ليهم حد أدنى ما ينفعش المدرسين يقلوا عنه و الا يمشوهم.....المدرسين بيشرحوا بضمير جدا و غالبا المجهود فى البيت بيكون متابعة بس,مش شرح من أول و جديد

 

*فيه اهتمام بالتواصل مع الأهل و متابعة أى شكوى

فيه تطوير و تدريب مستمر للمدرسين و تطوير لسبل التعليم

عندهم مسرح متميز و مكتبة على مستوى عالى جداً

 

بالنسبة للعيوب,من وجهة نظرى:

 

*عدم الاهتمام بالدين,يا دوب الحصة بتاعة الوزارة و بس

 

الاهتمام بالأنشطة ساعات بيبقى زيادة لدرجة انه يزنق المدرسين فى الوقت.....الادارة عايزة الأولاد يتمرنوا على نشاط أو حفلة مثلا و ساعات ده بيكون فى وقت حصص مثلاً....دى بتبقى مشكلة للمدرسين أساساً لأنهم لازم يشرحوا للأولاد اللى فاتهم

ساعات الادارة بتهتم برأى الأهل زيادة عن اللزوم حتى لو ما عندهمش حق....و ده حال كل المدارس الاستثمارية

يعنى من وجهة نظرى و اللى شفته .....ان أولياء الأمور بيكونوا سعداء جداً بالمدرسة......اهتمام بالأنشطة و الجانب الأكاديمى و الحفلات,يعنى من كله

 

Kouky5 

 

بالنسبة لموضوع انهم بيهتموا براي اولياء الامور علي حساب المدرسة انا هحكي عن موقف لسه عارفاه من والدة طفل معانا في المدرسة بس فرع مدينة نصر انها مبسوطة من المدرسة بس صادف ان في كي جي 2 ان مدرسة العربي اللي خاصة بالكلاس بتاع ابنها مستواها مش حلو واولياء امور كتير اشتكوا ورغم كدة الادارة كانت ردها مش هنقدر نعمل حاجة السنة دي وفعلا المدرسة كملت لاخر السنة وماتغيرتش يمكن يغيروها السنة الجاية لكن ده محصلش خلال العام الدراسي وده شيء برضه خوفني ..وانتي عارفة الموقف ده لانك اتعرضتي للموقف ده في غرياني لما صادف ان مدرسة الانجليش مكنتش قد كدة وفكرتي تنقلي ابنك لكن الحمد لله الادارة استجابت في الترم التاني وغيرت المدرسة

 

رنون  3-2010 

 

انا في راي ان بالنسبة للمناهج حلو والكم حلو لانة في شغل لكن للاسف بالنسبة للتطبيق اي الشغل مع الطالب بالمدرسة ضعيف يعني الطالب بيرجع مفيش استيعاب جيد

بالنسبة لشكل المدرسة هي مش جديدة ومش واسعة قوي لكن الادارة في تفاهم نوعا ما مع اولياء الامور ومع ذلك كان في كتير بيشكروا فيها وانا مش عارفة ظروف السنة دي ولا اية



Dr. R &M  مارس 2011 

 

السلام عليكم و رحمة الله 
من فضلكم يا جماعة انا عايزة اعرف احدث المعلومات عن مدرسة المصرية فرع مدينة نصر علشان أنا ذهبت اليوم للمدرسة علشان اقدم لابنى (بيبى كلاس) و تم تحديد مقابلة لنا الاسبوع القادم ، ابنى عنده سنتان و نصف ، كيف يستطيع الاجابة عن الالوان مثلا؟ هو اصلا ممكن يرفض الكلام معهم ، اذا كيف يتم تقييمة؟
عايزة حد يقول لى كيف استعد لهذه المقابلة؟ و هل فعلا فرع التجمع أحسن؟ 
شكرا جزيلا،،

 

 NONAAMR48   أبريل 2011 

 

المستوى العام دراسيا و أخلاقيا وادبيا رائع ولكن بالنسبه للمصاريف بيستهبلوا جامد جدا  كل سنه فى زيادات مستفزة

 NONAAMR48   أبريل 2011 

 

المستوى العام دراسيا و أخلاقيا وادبيا رائع ولكن بالنسبه للمصاريف بيستهبلوا جامد جدا  كل سنه فى زيادات مستفزة



إدخل تعليقك ورأيك فى المدرسه