2004-2006 - (12)‎ > ‎

2005 - Forpasis F. de Diego

FERNANDO DE DIEGO ENHOSPITALIGITA

Resumo publikigita en la paĝo 7 de la nº 371 (majo/junio 2005) de "Boletín",
la oficiala bulteno de Hispana Esperanto-Federacio.


En majo, Fernando de Diego estis enhospitaligita. Feliĉe Lorenzo Noguero informas jene pri la iom post ioma resaniĝo: "Mi montris al li la lastan numeron de 'Boletín' (iam li kunredaktoris ĝin), kaj mi legis la plaĉan artikolon "dediĉitan" al li. Krome, mi aldonis, ke multaj geesperantistoj daŭre interesiĝas pri li kaj lia sanstato. Mi eĉ parolis iomete en Esperanto kaj li respondis kelkajn vortojn. Li montris dankemon al ĉiuj".


ADIAŬ AL FERNANDO DE DIEGO
1-a de julio, 2005

Resumo farita de Lorenzo Noguero
kaj publikigita en la paĝo 16 de la nº 372 (septembro/oktobro 2005)
de "Boletín", la oficiala bulteno de Hispana Esperanto-Federacio.


Ĉi-someron, domaĝigis la tutan esperantistaron -aparte la hispanan kaj hispanlingvan- la notico pri la morto de Fernando de Diego, okazinta nur dek tagojn antaŭ la eko de la Hispana Esperanta-Kongreso kiu pretis omaĝi lin.
 

Fernando de Diego mortis la 1an de julio en Zaragozo, jam sufiĉe aĝa kaj kun malforta sanstato, des pli pro la morto de sia edzino Czesia en Pollando la pasintan jaron, kio profunde deprimigis lin. La samideano Enrique Navarro ofte vizitadis Fernando de Diego-n dum la lastaj tagoj de lia vivo.
 

La novaĵo disvastiĝis vendredon la 1an de julio. La funebraĵoj okazis la 2an de julio en la tombejo "Cementerio de Torrero" en Zaragozo. 
 

Ĉeestis kelkaj gefamilianoj kaj grupo da geesperantistoj el la asocio "FRATECO". Lorenzo Noguero, kiel prezidanto de la asocio kaj ankaŭ nome de diversaj institucioj (inter ili de UEA kaj HEF), komunikis kondolencojn al la gefamilianoj; kun Óscar, frato de Fernando, eblis paroli en Esperanto. En florkrono dediĉita al Fernando de Diego legeblis: "La Esperanto-mondo, kun admiro". Enrique Navarro fine legis kelkajn emociigajn vortojn esperante kaj hispane. Poste okazis ne entombigo, sed kremacio. 
 

La dimanĉon 3an de julio aperis artikoleto en la ĉefa Zaragoza ĵurnalo "Heraldo de Aragón" pri la mirinda tradukinto de "Don Quijote" al Esperanto.


Kaj jen, klarigo pri dato: ne la 30an sed la 1an...  
 
Unue oni diris al mi, ke Fernado de Diego mortis la 30an de junio kaj tiel estis disvastigata la novaĵo kaj tiel aperis en "Boletín". Sed aperis indikoj pri la eblo ke la oficiala morto okazis la 1an de julio. 
 
Por finfine klarigi la aferon, mi iris al oficejo de la "Registro Civil" de Zaragozo. 
 
Konklude, FERNANDO DE DIEGO DE LA ROSA mortis en Zaragozo (laŭ la oficiala registro) la 1an de julio de 2005 (vendrede), je la 1a kaj 50 minutoj.
 
Do, oni povas diri ke la 1an mortis la 1a (el la hispanaj tradukistoj).
 
Eble kelkaj opinios, ke tiu dat(en)o ne estas grava... kaj ili ja pravas. Kio gravas estas la jeno: la homo mortis sed la memoro kaj la verko(j) ade vivos.

Fernando de Diego mortis oficiale pro kancero (krom aliaj komplikaĵoj) kiam li estis sufiĉe aĝa kaj kun malforta sanstato. Sed verdire, ekde la morto de sia edzino en Pollando la pasintan jaron, li jam ne tro emis vivi.



Comments