2004-2006 - (12)‎ > ‎

2004 - Zamenhofaj tagoj

ZAMENHOFAJ TAGOJ
KAJ FRATECA TAGMANĜO


Resumo verkita de Lorenzo Noguero
kaj publikigita en la paĝoj 13-14 de la nº 369 (januaro/februaro 2005) de "Boletín",
la oficiala bulteno de Hispana Esperanto-Federacio.


De antaŭ iom da tempo loĝas en Zaragozo Fernando de Diego, elstara figuro de Esperanto, aŭtoro de la "Granda vortaro Hispana-Esperanta" kaj danke al kiu estis esperantigitaj verkoj kiel "La Inĝenia Hidalgo Don Quijote de la Mancha""La arbo de la sciado" inter multaj aliaj. Li revenis al Hispanio ekde Pollando post la bedaŭrinda morto de lia edzino. La 15an de decembro ni celebris la Zamenhof-feston per poezio kaj aliaj frandaĵoj. Ni havis la honoron ricevi la ĉeeston de Fernando de Diego kaj ni profitis la momenton por iel esprimi nian admiron kaj dankemon.

Lasttempe estis publikigitaj kelkaj artikoloj kaj leteroj pri Esperanto. Ekzemple, la ĵurnalo "El Periódico de Aragón" publikigis la 9an de decembro leteron de Lorenzo Noguero pri Esperanto kaj homaj rajtoj (sub la titolo "El Esperanto") okaze de la 50a jara datreveno de la Rezolucio de la UNESKO pri Esperanto.

En la ĉefurbo de Aragono aŭdiĝis Esperanto en grava evento. En Zaragozo, de la 3a ĝis la 11a de decembro okazis la 9a Festivalo Nacia de Kino de Junaj Reĝisoroj "Urbo Zaragozo". Dum la inaŭguro kaj dum la fermo, oni prononcis la bonvenon en diversaj lingvoj, el inter kiuj unue en Esperanto (!) eĉ kun perfekta prononco kaj kun mirinde belega voĉo. Tiu surprizo estis iniciato de Beatriz Pitarch, la junulino kiu prezentis kun Luis Roderas la spektaklon (en kiu krome estis premiita la aktorino Aitana Sánchez-Gijón). Povas ŝajni detalo sed mi spertis tion kun granda emocio: Eble unafoje en la historio de la kino-festivalo oni komencis per bonvenigo al la publiko en Esperanto. Bone, fakte Esperanto kaj kino estas lingvoj kiuj naskiĝis preskaŭ samtempe (1887 kaj 1895, respektive). Eĉ alvenis al mia retino ebla moto: "Zaragozo kaj kino: jen mirinda kombino".

Kaj laste (kaj haste) alia rimo. En la "Frateca" tagmanĝo okazinta la 18an de decembro, la Prezidanto de nia societo, prenante pokalon, proponis toston antaŭ ĉokolada deserto: "Por Esperanto kaj per ĉampano, je via sano samideano!".


Comments